26 июля, 2022 - 15:34
Бюгюнлюкде жашау болумла тюрлене, аслам зат ёзгерип, тюнене алгъан усталыгъынг шёндюгю заманнга келишмей къалгъанын сынай, кёре баргъан кезиудю. Кёплеге ишлерин алышындырыргъа, баш, юйюр кечиндириуню бирси амалларын излерге тюшюп да къалады. Башхача айтсагъ а, жаланда бир угъай, талай усталыгъы болса, неда къолу бла абери эте билсе, тюз боллугъуна ийнаннганла асламдыла.
Аладан бириди Бечелланы Альфия. Ол юч сабийни анасы болгъанына да къарамай, «Усталыкъ» окъуу араны курсун тауусуп, бу кюнледе къызыл диплом бла саугъаланнганды.
Аны республикада аллай ара болгъаныны, кесине башха усталыкъ алыргъа онг чыгъарыгъыны юсюнден хапары да жокъ эди. Бир кюн Интернетни ачханында кёргенди ары конкурс болгъанын эмда массаж этиучюлеге бла медсестралагъа жыйырмашар адам алыргъа конкурс барлыгъын.
Ызы бла арагъа кирирге кёлленеди. Конкурсда жетишимли болуп, аны хайыры бла окъуугъа киреди. Ууакъ сабийлери болгъан тиширыу ёсдюргенлерине биринчи медицина болушлукъ керек болса, биреуню излей тургъунчу, кеси къараяллыгъына къууанады бюгюнлюкде. Аны бла бирге уа медсестра болуп ишлерге онг чыкъгъанына, уколланы этерге, капельницала сала билгенине да.
Эндиге дери уа Альфия Нальчикде педагогика колледжни социал ишчилени хазырлагъан бёлюмюн жетишимли тауусуп, андан сора да, ол ызда билимин КъМКъУ-да ёсдюргенди. Бу жаны бла ишлеп да тургъанды.
Ол дагъыда бахчачылыкъны сюеди. Анда тахта кёгетледен сора да, гюлле ёсдюреди. Аны тынгылы терек бахчасына да кёпле сюйюнедиле. Сабийлерин да болушдура, иш юсюнде чыныгъыргъа юйретеди.
