26 июля, 2022 - 13:59
Бу хапарын айтхан къыз бек ариуду. Биз экибиз орамны бирге барсакъ, анга къарамагъан жокъду. Тиширыула, адетде болуучусуча, анга Аллах берген сюйдюмлюкню кечалмай, эринлерин къаба, зарланып. Эр кишиле уа керти жюрекден къууанадыла анга, къарагъанлары да – сукъланып! Ала, машинада бара болсала, штраф салынырыкъ жерде окъуна тохтап:
- Не бла болушайыкъ? Къайры элтейик сени? - деп жалынадыла.
Жаяу баргъан тюбесе, къолунгда жюгюн алыргъа чабады.
- Аллах, Аллах, быллай мёлекге хуржун кётюрюрге жараймыды?! - деп.
Башхала уа юйюнгде бир бузулгъан затынг бар эсе, аны ишлейик дерле, киногъа, кафеге чакъырырла, бир татыулу зат бла сыйларгъа излерле. Ма алайды.
Ариулукъну не кючю барды! Автобусда да адамла анга жер къоярла. Баргъан жолунда, жауун кёлге жыгъылырыкъ, машина тюбюне тюшерге болсала да, бир жанына турурла, жолну эркин эте. Ишинде да аны сыйы-намысы жюрюйдю, таматасы да бек багъалы кёреди. Да кёрмей а, ол бек акъыллыды сора, бек фахмулуду.
Билмеген заты жокъду, аны-муну унутду деп да, киши кёлкъалды этмейди – эси кючлюдю. Аны юсюне ол, ана тилни бла орус тилни санамай, дагъыда юч тилде сёлешеди – ингилиз, француз, испан. Къытай тилге да юйрене турады, анда да ажашырыкъ тюйюлдю.
Къыл къобузда согъады, жыр, назму тагъаргъа, айтыргъа да устады. Музыканы бек терен сезеди. Анса уа сурат этиуде бирлеге оздурур. Ол жаны бла да да ангыламы игиди. Къолгъа алгъан иши битмей къалмайды.
Аны юсюне уа – гитче, уллу ишде да насыбы тутханладанды! Телефон бла сёлешгенлей, иши тынып къалады. Адамла тохтаучу жерге жетгенлей, такси сакълап турады. Аны къой, хакъсыз элтирге окъуна хазырды. Лоторей билет алса – къытмай къоймайды. Тенгизге солургъа барса, бир жауун кюн болмаз! Ёмюрюнде дискотекагъа бир кере барады да, анда да мени бла танышады.
Халалды, къайгъырыулуду, манга табын излегенлей турады не ишде да. Мен сагъыш этгинчи, ол: «Быллай ариу кюн юйде олтуруп турмай, хауада да бир кесек айлан, нёгерлеринг бла рестораннга неда футболгъа бар», - дейди.
Къонакъла не заманда келселе да, бет жарыкълы тюбейди. Ушакъгъа къошулса, жаланда акъыллы затла айтады.
Быллай бир зат билгенликге, ол жаш къызды, субайды, уялчакъды. Кеси да жаланда мени сюеди. Ма аллай къыз керекди манга, таный эсегиз, бир айтыгъыз…