14 марта, 2023 - 13:59
Миллетибизни тамблагъы кюню жаш тёлюбюздю. Бусагъатда къыралны окъуу юйлеринде билим ала, усталыкълагъа тюшюне, артда аны иш юсюнде хайырлана, жамауатыбызны айныууна къошумчулукъ этерикдиле. Тырныауузда ёсген Гусейинланы Елена да, ахшы врач болуп, адамлагъа болушлукъ этер муратдады. Аны юсюнден материалны басмалайбыз.
Елена сагъынылгъан шахарны 5-чи номерли гимназиясын алтын майдалгъа тауусханды. Бир къырал сынаулада алгъан балларын да белгилерчады. Сёз ючюн, химиядан ЕГЭ-ден 95 балл алгъанды. Бу предметден устазлыкъ эмда репетиторлукъ этген Олеся Ашибоковагъа бла олимпиадалагъа хазырлагъан Идирисланы Светланагъа экзаменлеге тынгылы хазырлагъанлары ючюн ыразыды.
Врач усталыкъны уа къыз сабийлигинден окъуна сайлагъанды. Ана къарындашы къаты ауругъанында, анга себеплик эталмагъанына жарсый, жаланда бу жаны бла билим аллыгъына бютюнда тюшюннгенди.
Алай бла гимназияны тауусханындан сора ЕГЭ-леде бийик балла алгъаныны хайыры бла Москваны А.И. Евдокимов атлы къырал медицина-стоматологиялы университетини багъыу иш факультетини бюджет бёлюмюне киреди. Ары къагъытларын элтип, анасы Болатланы Рая бла баргъанды. Мектепде тюбегенлерин, вузну болумун да жаратханды. Алай бла бюгюнлюкде университетни тёртюнчю курсунда окъуйду.
Медицина ызда окъугъан тынч болмагъанын билебиз барыбыз да. Алай эсе да, таулу къыз, билим ала, «Лаборатория КДЛ»-де кечеги сменалада да ишлейди. Бу лабораториягъа уа къыралны жер-жерлеринден келтиредиле анализлени этерча материалланы.
– Кече ишлеп, эрттенликде окъуугъа баргъан къыйын болгъанын жашырмайма. Алай кюндюз ишлесем, окъууума ол тап болмайды, дерслерим жартылай къаллыкъдыла. Аны себепли кече ишлегенликге, заманны тап юлешсенг, жетиширге да болады. Сора онгум болса уа, солугъан да этеме. Алай бла жангыдан къарыу алама», – дейди ол ушагъыбызны кезиуюнде.
Китап окъуса да, ол кесин солугъаннга санайды. Студент жыллары пандемия болумлагъа тюшюп, окъууу да дистанцион халда бардырылгъаны ючюн практика жаны бла сынамы аз болгъанына жарсыйды. Аны себепли усталыкъ бла байламлы литератураны кёп окъуйду, ишге да сынамын байыкъландырыр ючюн киргенин айтады.
Ол дагъыда университетни кесинде къуралгъан студент илму кружокга кардиология ыз бла байламлы жюрюйдю. Алай бла уа артда ординатурада бу жаны бла билим алыргъамы огъесе башхасын сайларгъамы керек боллугъуна тюшюнеди. Нек дегенде врачла бери саусузланы кеслерин да чакъырып, алагъа аурууларыны, докторла алагъа къаллай амалла бла бакъгъанларыны юсюнден хапар айтадыла.
Андан сора да, Алёна (тенглери анга алай айтадыла) кружокну хирургия ызы бла байламлы жыйылыуларына барады. Студентлени анда диагнозну тюз салыргъа, саусузла бла сёлеширге, хар затны сорургъа тийишлисин юйретгенлерин жаратады. «Хар заманда да ауругъан адамны кёрсем, дунияда эм окъуулу врач боллугъум келеди. Адамла манга ышансала, тынгылы багъыу амалларымы юсюнден айтсала сюеме», - дейди.
Хирургияны огъесе кардиологияны сайларыгъына алыкъа толусунлай тюшюнмегенди, алай ординатурагъа да мында кирип, сынам жыйышдыргъанындан сора республикабызгъа къайтыр акъылдады. Уллу шахарлада ишлерге онгла аслам болгъанлыкъгъа, ёз жерини жамауатына болушур, усталыгъын да айнытыр муратдады.
