24 октября, 2023 - 13:59
Нальчикни онтёртюнчю номерли школун быйыл бошагъан Хаджиланы Ренат борчлу халда берилген эки дерсден да жюз баллгъа тийишли болгъанды. Эсигизге салайыкъ, ол орус тилден сынауну озгъан жылда онунчу классны тауусханында болжалдан алгъа бергенди. Алай эсе да, ышаныулугъу, билими аны алдамагъандыла, бийик эсепни алгъанды.
Математиканы уа профильли тюрлюсюн сайлагъанды. Беслан Буздовну бла бу дерсден устазы Фатима Бариеваны эмда кесини иш кёллюлюклерини себеплиги бла аллай жетишимни да болдургъанды. Алай бла окъугъан мектебин, юйретген педагогларын эмда ата-анасын, бирсилени да къууандыргъанды.
Ренат школ, район даражалы олимпиадалагъа да тири къатышханлай тургъанды. 2021-2022 жыллада Окъуучуланы битеуроссей дерс олимпиадаларыны шахарда озгъан урумунда математикадан хорлагъанды. Дагъыда бу дерсден «Кенгуру» деген ат бла школланы арасында бардырылыучу оюн эришиуде биринчи жерни алгъанды.
«Инженер-техника билим бериуню айныуу» деген тема бла озгъан илму-практикалы конференцияда да алчы оруннга тийишлиге саналгъанды. Школчуланы битеуроссей дерс олимпиадаларында ОБЖ-дан шахар даражалы кезиуюнде биринчи жерге чыкъгъанды.
2022-2023 окъуу жылда уа математикадан Школчуланы бла колледжлени окъуучуларыны Шимал-кавказ ачыкъ олимпиадаларында биринчи орунну алгъанды. Дагъыда бу дерсден онбиринчи класслагъа жюрюгенлени араларында КъМКъУ бардыргъан олимпиадада хорлагъанды. Андан тышында да, КъМКъАУ къурагъан «Илму, билим бериу эмда бизнес трансформациялы болумлада» ат бла озгъан кёрмюч-презентацияны «Илмуда шёндюгюлю технологияла» деген бёлюмюнде; «Илму бла бирге» квест оюнну «Экономикада логика» кесегинде биринчи болгъанды.
Сагъынылгъан окъуу жылда уа Хаджи улу Школчуланы битеуроссей дерс олимпиадаларыны шахар даражалы кезиуюнде экинчи жерге тийишли болгъанды. Дагъыда Халкъла аралы оюн конкурсда экинчи орунну алгъанды.
Андан сора да, дзюдодан жараулагъа жюрюйдю. Спортну бу тюрлюсюнден эришиулеге тири къатышады эмда саугъалары бардыла. Спорт бла да къаты кюрешгенини, кесини иш кёллюлюгюню себеплиги бла ГТО-ну мардаларын бийик даражада берип, алтын белгини алгъанды.
Алай бла, математикадан, бирси дерследен да эришиуледе, олимпиадалада болдургъан эсеплерин кёре, Ренат аны профильли тюрлюсюнден жюз баллгъа керти да тийишли болгъанына къууанабыз.
