26 октября, 2023 - 11:15
Узыншагъэм и уасэр къэпщIэну ухуеймэ, сымаджэм абыкIэ еупщI. Абы и жэуап пэжыр къозытыфынур узым иубыдаращ. Ди жагъуэ зэрыхъунщи, нобэрей ди зэманым цIыху узыншэхэр кIуэ пэтми нэхъ мащIэ мэхъу, пасэм щымыIа узыфэ куэдым урохьэлIэ. Абы и лъэныкъуэкIэ куэдрэ зызогъапщэ ди блэкIамрэ нобэмрэ. Къапщтэмэ, блэкIа лIэщIыгъуэм и цIыхухэр нэхъ узыншэу, нэхъ бэшэчу щытахэщ. Уеблэмэ абыхэм узыншагъэ быдэ яIэу нобэм къэсащ. ЖыпIэнурамэ, абыхэм я куцIыр куэдкIэ нэхъ быдэщ.
Сэ сызэреплъымкIэ, ар псори зэлъытыжар дыкъэзыухъуреихь дунейм, щIыуэпсым я щытыкIэрщ. Абы и къабзагъэм куэдкIэ елъытащ цIыхум и узыншагъэр. Абы и мыхьэнэр нэсу къыдгурымыIуэу ди щхьэм зэран дыхуохъуж. Дыкъэузыухъуреихь дунейр тхъумэным и пIэкIэ, ар пхъэнкIий идзыпIэ дощI. ГъащIэм псынщIэу зеужь, абы къыщыхъу зэхъуэкIыныгъэщIэхэм псэукIэр куэдкIэ нэхъ тынш къытщащI. Апхуэдэу щытми, IэмалыщIэхэр къагъэсэбэпу лажьэ IуэхущIапIэ зэхуэмыдэхэм я зэран йокI дызэрыбауэ хьэуам. Ар цIыхум и мызакъуэу, псэущхьэхэми зэран яхуохъу. Апхуэдэ Iуэхур къытфIэмыIуэхущэу щытми, хуэм-хуэмурэ узыншагъэр къегъэтIасхъэ.
Хущхъуэ гуэр зэзымыхьэлIэ цIыху щIагъуэ щыIэу къыщIэкIынкъым ди зэманым. Зэман жыжьэм ухуэплъэжмэ, апхуэдэ щыIакъым, нобэ дохутырхэм къагъэсэбэп хущхъуэ лIэужьыгъуэ къомыр ямыIэуи нэхъ узыфэ шынагъуэ дыдэми еIэзэфу щытащ. Уеблэмэ яхузэфIэкIырт фочышэр Iэпкълъэпкъым зыкIи зэран хуэмыхъуу къыхахыжын. ЕджэкIэрэ тхэкIэрэ тэмэму зымыщIа лъэпкъым Iущагъышхуэ зэрыбгъэдэлъам и щыхьэтщ ар. Адыгэхэм я IэзэкIэр къызыхэкIыр я набдзэгубдзаплъагъэрт, щIыуэпсым пэгъунэгъуу, абы пщIэ хуащIу къызэрекIуэкIырт. Ахэр фIыуэ щыгъуазэт хущхъуэ зыпылъ къэкIыгъэхэм. ИкIи абыхэм я зэманыр бламыгъэкIыу зэхуахьэсырти, илъэс псом ириIэзэрт. Дэтхэнэ цIыхуми ищIэн хуейт, псоми щымыгъуазэми, нэхъыбэрэ зрихьэлIэ узыфэхэм хущхъуэ яхуэхъуну удзхэр, ар зэрызэпхьэлIэну щIыкIэр. ЗекIуэр зи гъащIэм хабзэ нэхъыщхьэу хэта адыгэхэм я дежкIэ абы мыхьэнэшхуэ иIэт. Гъуэгуанэ тету абы зыгуэр къыщыщI хъумэ, узыр зэрызыщхьэщихынум щыгъуазэу щытыпхъэт. Ноби куэдым удз хущхъуэхэр къагъэсэбэп, ауэ, ди жагъуэ зэрыхъунщи, адыгэ IэзэкIэм и щэху псори ди зэманым къахьэсыфакъым.
ЩIэблэ узыншэ яIэным гулъытэшхуэ хуащIырт адыгэхэм. Щысабийм и деж щегъэжьауэ абы и узыншагъэр зэрапсыхьыным хущIэкъурт. И шхынкIи Iэпкълъэпкъым зегъэужьынкIи егугъухэрт. Адыгэ шхыныгъуэхэр къэтщтэни, абыхэм псоми къэуат ящIэлъщ, нобэ ди Iэнэхэм телъыр химие пкъыгъуэхэр нэхъыбэу зыхэлъ ерыскъырщ. Шэч хэлъкъым ар ди узыншагъэм зэрегуауэм. Щхьэхынагъэри узыншагъэм и бийхэм ящыщщ. ЦIыхум нэхъыбэрэ зигъэхъеихукIэ, и Iэпкълъэпкъыр зэщIигъэкIыхукIэ и щхьэ ифI зэрихуэу аращ. Сабийм и Iэпкълъэпкъым зэрызригъэужьыным епхащ адыгэ джэгукIэхэри. Ди жагъуэ зэрыхъунщи, ахэр псори ди гъащIэм хэтыжкъым. Сыт нобэрей сабийр зыхуейр? Компьютерым бгъэдэсу джэгунырщ. Апхуэдэуи ар махуэ псокIэ щысыфынущ. Ар и нэми зэран хуохъу, зи зыужьыгъуэ Iэпкълъэпкъми махуэ псом зэрызимыгъэхъейр тэмэмкъым.
Ди нобэрей щIэблэр лъэрымыхь зыщIхэм ящыщщ фадэри. Абы и пIэкIэ дяпэ ита нэхъыжьхэм къагъэсэбэпу щыта махъсымэм цIыхур гужан ищIу щытауэ аращ, узыншагъэмкIи зэран хъууэ ар къахутакъым. АтIэ узыншагъэр къэзыгъэтIасхъэ, акъылыр зыгъэутхъуэ фадэм махъсымэм и пIэр иубыдыныр сыт къызыхэкIар?
Зи узыншагъэм апхуэдэу гулъытэ хуэзыщIыж лъэпкъым, дауи, гъащIэм и адрей унэтIыныгъэхэмкIэ иIа зэфIэкIхэри нэхъ мащIэкъым.
Дривгъэплъэж адыгэ хабзэми, нобэрей гъащIэм къезэгъхэр къыхэдвгъэлъхьэж.
