27 февраля, 2024 - 15:34
Сабийле Бир къырал экзаменлени берген кезиуде биз да алагъа къайгъырабыз, бийик балла алгъанларыбыз болсала уа, аланы устазлары, ата-аналары бла бирча да къууанабыз. Сёз ючюн, химия дерсни алып айтханда, былтыр республикада андан ючеулен болгъандыла жюз баллгъа тийишли. Аладан бири уа Нальчикни отуз экинчи номерли мектебин былтыр бошагъан Мисирланы Саидады.
Ол сагъынылгъан мектепни Роснефть классына 2021 жылдан жюрюп башлагъан эди. Биринчи классдан да ол жаланда «бешлеге» окъугъанды. «Сигма» атлы Битеуроссей конференциялагъа, химиядан, бирси дерследен да Шимал-Кавказ даражада бардырылгъан предмет олимпиадалагъа къатышып тургъанды. Мисирланы къызчыкълары окъууну-билимни сюйген, эсли, тенглери бла терк илешип къалгъан сабийди.
Химиядан, бирси сынауладан да ол жетишимли болгъанды. Сёз ючюн, орус тилден – 91, биологиядан а 82 балл алгъанды. Алай бла уа алтын майдалгъа тийишли болгъанын бютюнда ачыкълагъанды. Нек дегенде «беш» белгиге тенг 70 балл болгъанын барыбыз да билебиз. Андан тышында да, анга алтын майдалы ючюн Бир къырал экзаменледе алгъан эсеплерине дагъыда он балл къошулгъанды. Саида репетиторлагъа да жюрюгенди. Аланы барысына да ыразылыгъын билдиреди. Ала кёп затха тюшюндюргенлерин да чертеди.
Ол кесине усталыкъгъа саулукъ сакълауну сайлагъанды. Башха жерде да окъуугъа тыйгъычсыз киргенликге, юйде ата-анасы ыразы болгъанларыча, Нальчикде къалып, КъМКъУ-ну медицина факультетини «Багъыу иш» бёлюмюне бюджетге киргенди. Алыкъа усталыкъда къайсы ызны сайларыгъында толусунлай тохташмагъан эсе да, университетибизде тынгылы билим алып, андан ары да окъур, сынамлы, жамауатха жарагъан врач болур умутдады.
Былтыр республикада сынауладан жюз балл алгъан сабийле бла КъМР-ни жарыкъландырыу министри Анзор Езаов да тюбешген эди. Ары да чакъырылгъанды Мисирланы къызчыкълары. Анзор Клишбиевич аланы алгъышлагъанды эмда андан арысында жетишимле тежегенди.
Биз да Саидача хунерли, окъургъа да итиннген сабийлерибиз бла ёхтемленебиз. Жамауатыбызны тамблагъы кюнюн айнытырыкъла да аллайларыбыздыла. Аны себепли уа ол ахшы билим алып, халкъ таныгъан адам, хунерли врач болур деп да ышанабыз.
