16 апреля, 2024 - 13:59
Мурзаланы Зулиха табийгъатыны ариулугъу бла айтылгъан жерлерибизден биринде – Элбрус посёлокда туугъанды. Мектепни да мында «бешлеге» бошагъанды. Бир къырал экзаменледе токъсан баллагъа тийишли болуп, КъМКъУ-ну медицина факультетини «Багъыу иш» бёлюмюне киргенди.
Университетде да айырмалы болгъанды. Ызы бла интернатураны, ординатураны да бюгюнлюкде кеси ишлеп тургъан Нальчикде республикалы сабий клиника больницаны мурдорунда окъугъанды. Саулукъ сакълауну къайсы ызын сайларыгъына уа, башха-башха бёлюмде иш не бла байламлы болгъанын кёрюп, артда КъМКъУ-ну сабий ауруула, аначылыкъ эмда гинекология кафедрасыны башчысы Жетишланы Рашит педиатриядан лекцияла берген кезиуде тюшюннгенди.
Алай бла «Багъыу ишни» алтынчы курсун бошап, андан ары билимин педиатрия жаны бла ёсдюргенди. Ординатурада болгъанында уа экишер айны, хар бёлюмге жюрюп, аланы таматалары бла багъыу къалай бардырылгъанына къарагъанды эмда тюрлю-тюрлю амаллагъа юйреннгенди. Кезиу пульмонология бёлюмге жетгенинде уа, коллективни жаратханды, алагъа башчылыкъ этген врачны саусузлагъа, аны бойсунууунда ишлегенлеге да къалай къайгъыргъанын кёргенди.
Ординатурада окъууун бошап, Зулиха бийик усталыкъ даражалары болгъан адамладан аслам затха тюшюнюрге, жангы амалланы билирге кереклисине ангылап, Москвада билимин ёсдюрюрге кёлленип, ары кетеди. Къыралыбызны ара шахарында И.М. Сеченов атлы биринчи медицина къырал университетни мурдорунда сабий клиника больницада тёрт айны ичинде усталыгъын ёсдюргенди.
Мында Москваны штатда болмагъан баш сабий специалисти-пульмонологу Александр Борисович Малаховдан, бирси белгили врачладан билим алып, къалай ишлегенлерин да кёрюп, къаллай амалны эмда методиканы хайырланыргъа, къайсы дарманны не заманда сайларгъа кереклисине тюшюнюп, сертификат да алып къайтханды.
Кертисин айтсакъ, таулу къызгъа анда иш да бергендиле. Алай ол республикада специалистле жетишмегенлерин ангылап, анда къалалмагъанды. Ызына къайтханында уа, аны тамата врач Людмила Хажсетовна Гусалова ишге алады. Андан бери уа Зулиха огъарыда сагъынылгъан больницаны пульмонология бёлюмюнде урунады.
Дуния пандемия болумгъа тюшюп къалгъанында уа, пульмонологла къалай жетишмегенлерин, аланы алларында къаллай жууаплылыкъ болгъанын барыбыз да билебиз. Ол кезиуде уа, жукъгъан аурууну биринчи толкъунунда республикалы сабий клиника больницаны мурдорунда ачылгъан эм къоркъуулу инфекциялагъа бакъгъан госпитальда ишлегенди.
Артда уа ол биринчи номерли клиника больницада ковидден ауругъан сабийлеге болушлукъ этер ючюн деп къошакъ халда ачылгъан жетинчи бёлюмде да ишлегенди. Бек къыйналгъанчыкъланы жанларын сакълагъан тынч болмагъанын, ишден юйге келсе да, акъылы анда тургъанын айтханды. Бу жанына къошхан юлюшю ючюн а республиканы Башчысыны ыразылыкъ къагъытына да тийишли болгъанды.
Больницагъа билмегенлей тереклеге къуюлгъан дармандан ичип ууланнган къызчыкъны келтирген эдиле. Аны жашаууна къоркъуу бек уллу болгъанды. Дениза Шебзухованы саулугъу игиленип къалырына ийнаннган къыйын эди. Реанимацияда да кёп тургъанды.
Гитче къызчыкъгъа къарагъан врач да Зулиха болгъанды. Ол билген амалын, заманын аямай, кече-кюн демей, Денизачыкъны жашаугъа къайтарыр ючюн кюрешни бардыргъанды. Аны хайыры бла уа сабийни жанын сакълап, ата-анасындан, жууукъ-ахлуларындан да ыспасха тийишли болгъанды. Ма аллай жууаплылыкъда, къыйын борчну толтуруу болумлада ишлей, аны аллына болушлукъ излеп келгенлеге таза жюреги, ачыкъ ниети бла къайгъырып, себеплик этеди. Жюреклеринде тюнгюлюу сезим жаратылып тургъанлагъа ышаныулукъну да береди.
Бюгюнлюкде ол алыкъа жаш специалист эсе да, Россейни педиаторларыны союзуну келечисиди. Союз жыл сайын да Москвада бардыргъан съездлеге къатышханлай турады. Андан сора да, Россейни пульмонологларыны конференцияларына барады эмда быллай тюбешиуледе бирсилени сынамларына тюшюне, кесини ишинде хайырланырча аслам затха да юйренеди.
Гитчелигинден да сейир китапланы окъууну жаратханды. Ол сюймекликге уа аны атасы Суфиян тюшюндюргенди. Кертиди, сабий абаданладан нени кёрсе, анга юйренмей къалмайды. Юйюрде уа китапланы почта бла окъуна жаздыртып алып да тургъандыла. Суфиян а, кеси врач болмагъанлыкъгъа, саулукъ сакълауну юсюнден хапарлагъан литератураны кёп окъугъанды эмда бу жаны бла аслам затны билген да этгенди.
Мурзаланы къызлары сайлаууна сокъуранмайды. Белгилегенибизча, ишден юйге келсе да, къыйналып тургъан саусузларыны халларын соргъанлай турады. Эрттенликде больницагъа барса уа, эм алгъа аланы жокъламай къоймайды. Аны мен бардыргъан иш биреуге керекди деген сезими уа бютюнда кёлленип ишлерге, сынам жыйышдырыргъа, жангы амалланы излерге, билирге итиниулюк, къарыу да бередиле.
