22 декабря, 2021 - 11:34
Сэри сощIэж МылэкIэ еджэу ХьэтIохъущыкъуейм нэхъ къуажапщэмкIэ лIы гушыIэрей зэрыдэсар. Ар щIэсщIэжри и цIэр гукъинэ схуэхъуауэ ара сфIощI. Сыту жыпIэмэ, а цIэр зезыхьэ нэгъуэщI цIыху срихьэлIауэ сщIэжыркъым, ди адыгэцIэхэми ещхьтэкъым. Мылэ и цIэр зыми емыщхьми, езыр адрей ХьэтIохъущокъуей лIы угъурлы Iэджэми хуэдэу гушыIэрейт.
АтIэ, иджы хуэдэу я нэр къыщхьэрипхъуарэ пIащIэу къамыжыхьу, нэхъапэм цIыхум гушыIэшхуэ яхэлърэ гушыIэну яхущIыхьэуи щытащ. Сытми, Мылэ и щхьэгъусэр къелъэIуащ, и щыкъу анэри къытелъэIухьыжри, и выгур зэщIригъэщIащ, я благъэжь фызыжь сымаджэм щIэупщIэну. Къуажэм и кIуэцIкIи и щIыбкIи ХьэтIохъущокъуейм гъуэгу дэкIуейрт, я кIыхьагъ-благъагъкIэ зэрагъэхьыщэ щымыIэу. Ауэ къуажэ щIыбагъ гъуэгур нэхъ зэгъуэкIти, Мылэ и щыкъу анэжьыр кърешэкIри къуажэм дэтщ, къыхужаIэнкIэ шынэри, тIэкIу зэрынэхъ кIыхьми емыплъу абыкIэ иунэтIащ.
АрщхьэкIэ щыкъу анэр къызыдежьу фызыр хъийм икIщ, моуэ жылэм дахэплъэу къуажэкIуэцIымкIэ дыкIуэцIрыш, жиIэу щиукъуэдийм, Мылэ, зихъунщIа пэтми, къимыIуэнтIэжу хъуакъым. Ауэ зи мурадыр къызэпауда лIы гушыIэрейм ар фызым хуигъэгъунт. Хуигъэгъуакъым. Абы нэхъей, Алыхьым иригъэхутылIэри, къуажэм кIуэцIрыкI гъуэгум къызэрытехьэжу, къыхуэзащ ныбэжьэгъу-гушыIэгъуу иIэм я нэхъ жьэрэIурэ дыдэр. Арати, адэкIи-мыдэкIи иримыхьэкIыу къреутIыпщ:
- Мыр слIо, си ныбжьэгъужь, уи щыкъу анэжьыр жьейуэ, уи фызыжь цIыкIур къыпIэщIэужэгъуауэ зэхэсхти, си фIэщ хъуатэкъыми, иджы Гундэлэн дэпшейуэ ара, къущхьэхэм кIэртIофкIэ епхъуэжыну? Къущхьэхэм я щIыщхьэ кIэртIофыр бэгъуауэ жаIэ мы гъэм. Уи гум къыхуэшэ къуатынщ а тIум къапэкIуэу, дауи. Сытым хуэдэу хьэлыуэ уи гугъэ абы я кIэртIоф хужьыр езыр. Зи, моуэ, умыщхьэхыу кIэртIофыр Иналхьэблэ лъэныкъуэкIэ епшэхамэ, къэп къэс зы фыз къуатынщ, щыкъу анэри къытралъхьэжу. ИтIанэ ди ХьэтIохъущыкъуей фызыншэжь къомым яIуэтэжынущи, уэри а уи нэр къызыхуикIыу жыхуэпIэм и курыкупсэм укIуэнщ…
Iуэхуншэрэ и гушыIэни къикIауэ къыхуэза ныбжьэгъу жьэрэIурэм витIым яхэуэу ерагъкIэ IэщIэкIа Мылэ, жьыIурыхьэгъуэ имыгъуэт щIыкIэ, фыз гуэрыр къоупщI:
- Ей лIы, ей, а къэвэреижьым «уи нэр къызыхуикIыу уздэкIуэну» жыхуиIар дэнэ?
- Нобэ къызэпха лейм фIэкIа гуэныхь уимыIэми, къемэт махуэр къэса иужькIи уэ уздэмыкIуэнуращ абы жыхуиIар! – Мылэ нэхъри губжьауэ витIым яхэуащ. ИтIанэ, игукIэ, сыт къыпыпхын мыбы, жиIэу щIегъуэжри, мобы и гушыIэм езым ейри пищэжу, къуажэм яходжэ: - Жылэ махуэ хъун! Щыкъу анэ фIыцIэжьрэ фыз фIыцIэжь цIыкIурэ нэхъ хужьыIуэкIэ хэт ихъуэжын! Уо-о-у, жылэ махуэ хъун!..
- Ей, лIы, ей! Алыхьым и хьэтыркIэ, а уи жьэр гъэбэяуи, жэнэтым укIуэну ухуеймэ, щIыбагъ уэрамымкIэ неуэ, - жи фыз фIыцIэ цIыкIум.
Мылэ, зыри зэхихыну хуэмейуэ, и макъым зригъэIэтырт:
- Уо-о-у, жылэ махуэ хъун!..
Быдэу жаIэж, абы иужькIэ, сыт хуэдизрэ псэужами, Мылэ и щыкъу анэр и пхъум деж къыдэмыхьауэ, фыз фIыцIэ цIыкIури, ямыхъуэжу къызэтена щхьэкIэ, и лIым игу итIысхьэу уэрам дэмыхьэжауэ.