12 апреля, 2022 - 11:15
Габоланы Карина Хасанияда 2-чи номерли шахар больницаны реанимациясыны медсестрасыды. Жангы коронавирус ауруу жайылгъан биринчи кюнледен окъуна ал сатырдады. Эслилиги уллайгъан адамдача болгъан жаш тиширыу саусузладан усталыгъын, жюрек жылыуун да аямайды. Анга уа саусузланы айтханлары, биргесине ишлеген нёгерлерини багъа бичгенлери да шагъатлыкъ этедиле.
Биринчи Чегемде жашагъан Жаболаны Лариса да анга ыразылыгъын билдиреди. «Бек къыйын болуп тюшген эдим больницагъа, сау къалырма деп умутум да жокъ эди. Врачланы, медсестраланы къадалып кюрешиулери бла сау къалдым. Карина уа ауругъанланы къатларындан бир такъыйкъагъа кетмей эди. Башымы, юсюмю жуууп, ич быстырларымы алышындырып тургъанды, сау къаллыкъ. Жашауну бла ёлюмню ортасына тюшюп, жууугъунг къатынгда болмай къалгъанда, хар бирибизге кёллендирирча сёзле табалгъан бир огъурлу тиширыуду. Аны ёсдюргенлеге да уллу ыразылыгъым барды. Анда болгъан ариу адеп-къылыкъ юйден, юйюрден келгени баямды», - дегенди ол бизни бла ушагъында.
Реанимацияда ишлеген врач Солтанланы Жаннета уа: «Каринача адамларыбыз болгъан къадарда, ишибиз иги барлыкъды. Ким да аперим берирча таулу тиширыучукъду ол», - дегенди.
- Бери тюшгенлени бирине да уллу кёллюлюк этмейбиз, къолубуздан келгенни аямай кюрешебиз. Хар бирине кеси адамыбызгъача къайгъырабыз, жарсыйбыз, аягъы юсюне болгъаннга бизни сынамыбыз, кючюбюз да себеп этгенине къууанабыз. Кертиди, алгъындан эсе кёпге къыйынды ишибиз. Коронавирус бла кёп адам тюшеди, энди ол къартды, жашды деп айырмайды. Кеси да бек къужур затды: къысха заманны ичинде огъурсузлугъун кёргюзтюп къояды. Энди игиге айланды деп тургъан адам, бир кесекден къыйын саусуз болуп, дуниясын алышып къояды. Аны кёрген бек къыйынды. Алай биз, мында ишлегенле, кесибизни бошламайбыз, бютюн къазауат этип ишлейбиз, - дейди Карина.
Шёндю больницалада ишлегенлеге бютюн къыйын тюшгени баямды. «Скафандрлада», къапха киргенча, сау кюнню ичинде бир айланчы?! Къалай чыдагъанларына сейир окъуна этеме. «Юйге келсек да, эшикде тешинип, быстырларыбызны жуууп, кесибиз жууунуп, тёшегибизге кючден жетебиз. Кёп заманда азыкъ ашаргъа къарыуубуз окъуна жетмейди. Сабийлерибизге да заманыбыз болмай къалады. Насыпха, мени къайын анам бла атам сабийлени манга жетдирмейдиле, сау болсунла.
Биринчи заманлада кесиме, юйюрюме да къоркъуу нек салама, кетейим да къалайым деп да келгенди Каринаны кёлюне. Алай мен да, башхасы да, ючюнчюсю да кетсек, ким къаллыкъды, ким ишлерикди, деген сагъышла тыйгъандыла. «Кетипми къаласа къатымдан, деп айтмагъанлыкъгъа, ол сорууну саусузланы кёзлеринде сезебиз. Сора аланы къалай къоюп кетгин?! Акъылыбыз аладады. Ма бусагъатда да, сени бла сёлеше тургъанлыгъыма, акъылым ишдеди, реанимацияда жатхан хар адам да эсимден кетмейди. Юйде да, бир бирибизге сёлешип, саусузланы халларын соргъанлай турабыз», - дейди Карина.
Ол реанимацияда бу жукъгъан ауруу жайылгъынчы да кёп ишлегенди. Анда ишни къыйынлыгъын башхаладан эшитип билмейди, иги сынам жыйышдыргъанды, ол а анга бюгюнлюкде бек жарагъанды. «Саусузлагъа болушалсам, жюрегиме хошлукъ келеди, жашауума ыразы болама. Биреу сау къалып, аягъы юсюне болгъанын кёрсенг, бу ауруу санга да къоркъуулу болгъанын унутуп къояса. Дунияны башын алгъан коронавирус кетер да, алгъын ырахатлыгъыбыз къайтыр деген умут бла жашайбыз да, олду бизни кёллендирген», - дейди Карина. Биз да анга, башха врачлагъа, медсестралагъа, бу аман ауруугъа къажау кюрешни кече-кюн да арымай-талмай, кеслерин аямай бардыргъанланы барысына да ыразылыгъыбызны билдиребиз, алагъа саулукъ, кюч-къарыу тилейбиз.