17 мая, 2022 - 15:32
Бир жол Чонайны полиция участкагъа чакъырдыла да: «Почтачыны нек тюйгенсе?» - деп, къаты соруу этип тохтадыла.
- Билемисиз, ол манга не этгенди?.. - деди Чонай, кючсюнюп.
- Не этгенди, айт эшитейик.
- Диванда олтуруп, газет окъуй тургъанымлай, почтачы юйге кирип келеди. Инбашына тагъылгъан сумкасындан конверт чыгъарады да, аны кёзюме тутады. Мен къууанч тыпырлы болдум, Къарачайдан сюйген къызымдан келген письмо сунуп. Конвертни къолундан алайым десем, берирге унамай тохтады: «Жырламасанг, берлик тюйюлме», - деп. «Мен жырлай билмейме», - дедим. Ол а: «Огъесе тепсеген эт», - деди. Мен анга тепсей билмегеними айтдым.
- Сора бердими конвертни?
- Угъай. Бир да болмай эсе да, киштикча макъыр, - деп тохтады.
Не этерик эдим, макъырдым аямай. Диванда жатып тургъан, жарты къалкъыу эте тургъан къарт киштигибиз да, башын кётюрюп, манга къарады, не этесе дегенча, кёзлерин жандырып. Къалай-алай да болсун, конвертни почтачыны къолундан тартып алдым да, терк окъуна къыйырын жыртып, ичинде къагъытны чыгъардым.
Къарасам, ол а военкоматдан келген повестка. Не этерик эдим, асыры ачыудан, кесими тыялмай, почтачы жашны къулакъ жанына жетдирдим. Терсмеми?! Кечгинлик беригиз…
- Кечгинликни бизден тилеме, андан тиле, - деп, Чонайгъа жан аурутуп, юйюне ашырдыла.
