28 июня, 2022 - 11:55
Масхара
- Билемисе, Жансох, мен тюнене ненча шеша аракъы ичгенме?
- Билеме, Албот! Сен кюн сайын да аудураса 2-3 шешаны. Тюнене ол мардадан озгъанмы этгенсе?
- Хау, шуёхум! Ийнанамыса, шахардан бир иги жашау къолайы болгъан ахлум ящик аракъы алып келгенди, мени кёре. Сау къаллыкъ, хар заманда алай этеди. Кеси да ичгиге сый берген адамды да, бир иги олтургъанбыз, тышындан адам къошулмай.
Ай таланнган, менден да отду ичерге. Мен тёртюнчю шешаны аудургъанлай, тилим бюлдюргю эте башлаучуду. Ол а алтысын атса да, сёлешиуюн тюрлендирмез. Жаным-тиним аллай мол жюрекли, чомарт кишини жюрекге жау жакъгъанча сёзлери.
Ичгини татыуун аныча ангылай билген къонакъ юйюме келсе, къалай зауукъду. Мени акъылыма кёре, жаннет дегенлери аллай асыулу адамлагъа деп ачылгъан болур?
- Албот, аны алайлыгъын а ары барсакъ кёрюрбюз.
- Мен ол жаннетни мында кёрюрге сюеме. Ары ашыкъгъанладан тюйюлме. Жансох, къарайма да, кесинги ол дунияда жаннетге хазырлап, бу дунияда андан къуру къала тураса. Эрттен азыкъны аллында шеша аудургъанды жаннет, ангылаймыса!
- Болур, жанымы къыйыры, нек болмайды. Алай сабийлеринги аууз къабынларын кюн сайын тамагъынгдан энишге жиберип тургъанны китап махтамаучуду. Тюнене, сен 3-4 шешаны аудура туруп, къатынынг къоншуладан ёнкюч ахча тилеп, ушхууур этгенин билмеймисе.
Жашынг бла къызынг а, сен тенгинг бла ичген аракъы шешаланы тюкеннге элтип, ётмек багъасын мажарып келгенлери санга жаннет эшиги ачылгъанча кёрюннгени бек сейирди. Гюняхлыса, харип, Албот! Кеч болгъунчу тобагъа къайт да, сабийлеринги къарынларын гыржындан тойдур, ач этме.
