5 июля, 2022 - 15:40
- Салах бла Саният юйдегили болгъанлы озгъан эки айны ичинде бу жолча бир бирлерине кёлкъалды болуп хыны сёлешмегендиле. Юйюр тамата эрттенликде ишге ашыгъып кийине туруп:
- Ариука, кёлегими тюймеси тюшгенди, аны тиксенг эди, - деди.
Жукъусу иги аязмагъан къатын, тёшегинден энди къобаргъа кюреше:
- Мен кийим тигерге окъумагъанма, - деп, бирси жанына бурулуп, башын жууургъан тюбюне сукъду.
Салах, аш къангагъа ашыгъышлы олтуруп, ауузланыр къайгъыгъа кирди. Кечеден къалгъан сууукъ хантусдан бир-эки уртлап, къашыкъны бир жанына салып: «Ашынгы не тузу, не мыстысы жокъду. Атанг, ананг сени не затха юйретген болурла?», - деп, иги да чамланды.
- Мен санга шапа тюйюлме, багъалы юй бийчеме, технология техникумда билим алмагъанма. Мени агрономгъа дипломум барды, - деп, Саният, башын жууургъандан къаратып, ачыуланды.
- Алай эсе, мени не будай сабанларым, не мамукъ плантацияларым жокъдула. Манга аш эте, кийимиме тюйме тиге билген юй бийче керекди, Саният, ангыладынгмы? – деп, аш къангадан секирип туруп, жолуна ачыулу кетди.
- Манга да керек тюйюлдю, сенича, къадыр къылыкълы эр, - деп, Саният тёшегинден тура келгенлей, кюзгю аллына олтуруп, къашларын иничгертирге, жукъартыргъа киришди.
