13 октября, 2021 - 11:38
Адам къайсы ишни тутса да, анга битеу жюреги бла берилирге керекди. Алай болмаса, ишни къыйматы боллукъ тюйюлдю. Аны толу ангылап, Асанланы Танзиля кеп жылланы ишинде атын махтау бла айтдыргъанлай келеди. Ол Бабугент элни «Чынарчыкъ» деген сабий садында 2008-чи жылдан бери тамата воспитатель болуп ишлейди.
1993-чю жылда Танзиля Бабугент элни орта школун бошап, Къабарты-Малкъар къырал университетни тарых-филология факультетине кирген эди. Аны бошагъандан сора, филолог деген усталыкъны алгъан эди. 1996-чы жылда кесини туугъан эли Бабугентде «Чынарчыкъ» деген сабий садда психолог болуп ишлеп башлагъан эди. Арт онюч жылны ичинде уа тамата воспитатель болуп, сабий садны ишин тап къураугъа битеу кючюн береди. Асанланы Танзиляны иши бек кепдю, болса да ол хар затны келю бла тамамлайды. Сабий садда бардырылгъан кеп тюрлю къууанчлагъа да сценарийлени кеси жазады.
Танзиляны хар жаны бла да Аллахдан келген фахмусу барды. Ол назмула да жазады. Нзмуларыны тематикасы кеп тюрлюдю. Назик, сабыр ауазлы Танзиля аланы кеси окъуса уа, адам солуун алмай тынъылар, жюрек тынчлыкъ, сабырлыкъ, монглукъ табар! Асанланы Танзиля – лирикди! Чирик келню тийресинде бардырылгъан «Строки на Секретном» деген поэзия тюбешиулеге да тири къатышады.
Асанланы Танзиляны сюймеклиги, жюрек жылыуу да сабий садха жюрюгенлеге, поэзиягъа, кесини ез сабийлерине да жетеди: ариу сезлю ана юч жаш есдюргенди, туудукъчугъуна къууанады.
