26 июля, 2022 - 15:34
Окъуу жыл тауусулгъандан сора школланы, вузланы бошагъанланы жетишимлерин сакълагъан, аланы алгъышлагъан ахшы тёре болуп къалгъанды. Ол жаланда сынаула ОГЭ, ЕГЭ халда угъай, башхача берилгенли бери да алай бола келеди. Экзаменлени эсеплери белгили болгъунчу уа, адам жашаудан бир сейирлик затны сакълагъанча, неден эсе да умутлу болгъанча сезимни сынайды.
Алайды да, бизни ёсюп келген жаш тёлюбюз хар заманда да кёллендиргенлей келеди. Аланы ахшы жетишимлерине жаланда кеслери, ата-аналары, устазлары угъай, биз да къууанабыз, ышанабыз. Билесиз, орус тил сабийле борчлу халда берген ЕГЭ-леден бириди. Аны бермей, ол не аттестат алалмайды, вузгъа да ансыз киралмайды. Быйыл бу дерсден бизни республикада онеки выпускник 100 балл алгъанлары белгили болгъанды.
Аланы санында уа Яникой элни Байсолтанланы Алим атлы битеулю билим берген школуну окъуучусу Гыжгыланы Салима да барды. Къызчыкъ математикадан да «беш» алгъанды. Ол дагъыда сынауланы орус литературадан бла ингилиз тилден бергенди. Филология жаны бла билим алыр мураты барды.
Орус тилден жюз болмаса да, токъсан баллны уа алырма деп, алгъадан ышаннганма. Андан устазыбыз Жолабланы Мадина Магомедовнагъа ыразылыгъымы билдирирге да сюеме. Бизни окъутуугъа-юйретиуге аны уллу къыйыны барды, - дегенди Салима кеси уа бизни бла къысха ушагъында.
Быйыл мектепни тауусуп, алтын майдал алгъанладан бири Тырныауузну бешинчи номерли гимназиясындан Жанатайланы Азинатды. Къызчыкъ орус тилден сынаудан 94 баллгъа тийишли болгъанды. Математикадан «беш» алгъанды, тарыхны уа 72 баллгъа бергенди.
Былайда ол сайлагъан дагъыда бир экзаменни чертирге сюеме. Сынаула ЕГЭ халда берилип башлагъанлы да орус литература эм къыйыннга саналып келеди. Аны алайлыгъын устазла кеслери да белгилейдиле.
Азинат а бу предметден 96 балл алгъанды. Кесини жетишими ючюн а устазы Хаджиланы Халиматха ыспас этеди. Ол окъутхан сабийледен бири да репетиторгъа жюрюмегенин, Халимат Зейтуновна алагъа хар ыйыкъдан сынау иш берип, аланы эсеплерин а къабыргъада кеси жарашдыргъан таблицагъа жазып тургъанын айтады.
Алай бла уа окъуучула ЕГЭ-де ненча балл алыргъа боллукъларын кёрюп тургъандыла. Къайсы теманы, жорукъну къайтарыргъа, неге бегирек эс бурургъа тийишлисин да ангылагъандыла, билгендиле. Сынамлы устазны бу башламчылыгъы кесини хайырын да бермей къоймагъанды.
Алай бла ол окъутханланы арасында Текуланы Амина орус тилден – 98, дагъыда жетеулен да 90-дан аслам баллагъа тийишли болгъандыла. Химиядан а, Азинатдан сора да, Саидланы Эльвина 93 балл алгъанды. Алайды да, сагъынылгъан гимназияны тауусханла педагоглары алагъа къаллай къыйын салгъанын толусунлай ачыкълагъандыла.
Жанатайланы къызчыкълары уа дагъыда быйыл да, былтыр да малкъар тилден район даражалы олимпиадада биринчи призёр болгъанды. Жетинчи классда окъугъанында «Живая классика» Битеуроссей конкурсну регион кесегинде алчылыкъны алып, аны бла байламлы «Артекде» да болгъанды.
Озгъан жылда «Марафон талантов» эришиуде къырал даражада оналты адам айырмалыгъа саналгъанды. Аланы санындады таулу къызчыкъ да. Мындан арысында уа ол, вузгъа филология жаны бла окъургъа кирип, литературоведение бла кюрешир акъылдады. Эсигизге салайыкъ, быйыл школланы тауусханланы тогъузунчу классда болгъан кезиулери пандемия башланнган, окъуучула билимни дистанцион халда алыргъа кёчюрюлген кезиуге тюшгенин. Билесиз, ала сагъынылгъан халда иги кесекни окъугъандыла. Аны ючюн а аланы жетишимлери бизге бютюнда багъалыдыла.
Бюгюнлюкде, билим бериуню качествосу бютюн суралгъан кезиуде, орус тилни окъутханлагъа бегирек къыйын болгъаны баямды. Бу предметден ЕГЭ-леге выпускникле аслам эмда борчлу халда къатышханларын, белгилегенибизча, барыбыз да билебиз.
