19 сентября, 2022 - 15:40
Я уллу Аллах, адамлада бу эки бетлилик жашауну къалай тутхучсуз да, мутхуз да этеди. Аны айтханым, бизни Чукуна деп бир шуёхубуз барды. Бизни десем да, аны кёпле таныйдыла. Алай керти сырын, къылыгъын а билмейдиле. Жашырмай айтайым, ол бетине юч-тёрт тюрлю къап киеди, мен сизни аны жаланда бир къабы бла шагъырей этеийм.
Былай къарасанг, бир тынч, огъурлу жан. Аны жойкъулланнганына, сары жауча жагъылгъанына къарасанг, бу адам мёлек болуп, кёкге учуп кетмей къалай турады, дерсе. Алай бир кесек шагъырейленсенг, кёзбау къабы кетип, башхасы бетине аламат тап ушап къалады. Тюз аны кийгенлей, махтаныр, сант сёзлени бир-бири ызындан бардырыр. Ол алай этсе уа, кесин бир акъыллы сёз, оюм айтхан сунар. Алай эте башласа, мушулдауукъ бурунун чюйюрюп, эки къынгыр бутун тюз сюерге кюреше, аякъларын бийигирек кётюрюп атлайма деп, бирде абыныр, сюрюнюр.
Шуёхубузгъа бузукълукъ салгъан аны юсюнде дагъыда быллай бир тапсыз къылыкъ барды, биз аны не бек кюреше эсек да, къойдуралмайбыз. Анга юсюнде болгъан шарайыпны эсгертсенг, керексиз гынттысы башына чапхандан болур, баям, не гитче тырман сёзню да кётюрмейди. Тюз да къуугъа жилтин тюшгенча болуп, тютюн этип башлайды. Керти айтама, тютюню чыгъады, ийис этгенлей турады. Анга да ол жанындан эсе бек сюйген хайырсыз шайтан суудан уртлагъаны къошулса уа, бек игиси – анга къатылмауду, жалламауду.
Кесини жашауу да къуру тютюн этгенлей кетип барады. Андан болур ачыуу мыйысына чабып, катынга келсе, чючгюрюп, башынгы хайран этеди. Ол да не! Бек аман къылыгъы уа – тил тутуууду. Кёлюне бир аман акъыл келсе, жолда бара абынса да, тенглерине гурушха болур. Сора сау кёрейм, бир-эки ыйыкъ кёбюп, юрюлюп, мор бет алып айланыр. Кёлкъалды болгъан адамны телефонун бир ненча кере бурур да, сёз айтмай салыр. Дагъыда бир ауукъ заман оздуруп, биягъы хылисин этер.
Шуёхла уа, Чукунаны къужур къылыкъларын масхара эте, аны бет къапларын ахыры бла да къалай тешдирейик деген акъылда жашагъанлы уа быйыл тамам 20 жыл.