18 октября, 2022 - 15:40
Бусагъатда белгили художниклени тизмелеринде, анга отуздан энди атлагъанлыкъгъа, таулу жаш Аналаны Омурбекни жашы Муратны аты терк-терк айтыла башлагъанды. Газет окъуучуларыбызны аны бла шагъырей этебиз.
- Мурат, кесинги юсюнгден бизге бир хапар айтсанг эди. Бу сурат ишлеу хунер санга кимден ётген болур, къалай бла келгенди?
- Нальчикде туугъанма, ёсгенме. Юйюрюбюзде художник болгъанды деп айталмайма, атам, анам да башха иш бла кюреше, жашау тиричилигин эте жашайдыла. Бу тюрлю хунерим болгъанын школда окъугъанымда эслегендиле – къабыргъа газет этиучю эдим анда. Сурат этиуден устазым айтып, анам художестволу школгъа элтген эди ансы, юйде таматала мен баш тутарча усталыкъ алсам сюйгендиле. Алтынчы классда окъуй эдим ол заманда. Тёрт жыл анда живописьге юйреннгенме.
- 2005 жылда, санга онтёрт жыл болгъанда, «Все краски мира» деген халкъла аралы сабий конкурсда лауреат диплом бла бирге Россейни культура министри А.С. Соколовну ыразылыкъ къагъытын алгъанынг эсимдеди. Дагъыда ол художестволу школда окъугъан жылла не бла къалгъандыла эсингде?
- Сабий конкурслада хорламларым кёп болгъандыла. Сёз ючюн, «Выборы», «Наш город» деген эришиулени экисинде да лауреатха чыкъгъанма. Аллай хорламла сабийни бек кёллендиредиле. Область магъаналы кёрмючлеге да къатышханма ол заманда. Не тюрлю экспозициялагъа да ийгендиле суратларымы. Сау болсунла.
- Андан ары къадарынг къалай болгъанды?
- 2008 жылда Ростовда М.Б. Греков атлы художестволу училищеге киргенме. Анда ючюнчю курсда окъугъанымда, «Творцы ХХI века» деген кёрмючде «Пейзаж с церковью» деген суратым ючюн «Приз зрительских симпатий» деген даражагъа, ызы бла Саратовда баргъан Битеуроссей пленэр эришиуде экинчи жерге чыкъгъан эдим. Ол заманда Императорну православный палестин обществосу мени Сыйлы къагъыты бла саугъалагъанды.
Училищени 2013 жылда бошап, андан ары Москвада Художестволаны Россей академиясыны Суриков атлы художестволу институтунда окъугъанма.
- Къыйын болур эди юйден узакъда?
- Тынч да болмаз, Ростовда болгъанымда къыйналгъанма биринчи заманда. Москвагъа уа, юйренип тюшгенме да, къыйын кёрюннгенди деп айталмайма. Анда окъугъан жылларым кёп бергендиле манга, жол да ачхандыла. Художестволу академия алтын майдалы бла саугъалагъан эди. Россейни культура министерствосу уа Къырал стипендиягъа тийишли кёргенди. Ол аз тюйюлдю студентге.
- Устазынга кимни санайса?
- Николай Владимирович Колупаевни мастерскоюнда окъугъанма. Олду устазым. Сора дагъыда совет художникледен, аланы ишлеринден да юйреннгенме. Бюгюн да юйренеме.
- Диплом ишинг не болгъанды?
- «Къурман» деген сурат.
- Кёп кёрмючлеге къатышаса. Не бередиле ала санга?
- Кёрмючледе сурат ишлеу къайда, къалай айныгъанын билирге онг чыгъады. Кесинг да юйренесе, сенден да юйренедиле. Жандауурлугъ а таулуну къанындады.
- Илхам къайдан келеди? Темаланы къалай сайлайса?
- Тюшюмде кёреме асламысында. Темала тапхан къыйын тюйюлдю, аланы суратда кесинг оюмлагъанча кёргюзтген амалланы излерге керекди ансы.
- Бусагъатда не бла кюрешесе?
- М.Б. Греков атлы аскер студияда ишлейме. Плакатла, баталия темалы суратла, портретле, излегенлерине кёре, не деселе, аны ишлейме.
- Халкъынг бла байламлыгъынг кёп суратларынгда кёрюнеди: «Таула», «Кийиз», «Эшекде баргъан жашчыкъ», «Къурманнга аталгъан ёгюз», «Ауушда», «Къойчу», «Тарда», «Жол айырылгъанда», дагъыда башхала. Художникле союзуна киргенсе. Москвада къалыргъамы сюесе?
- Угъай, энтта да бир тёрт-беш жыл мында болургъады муратым, байламлыкъла къураргъа. Артда уа юйге, Нальчикге, къайтырыкъма.
- Аллах онг берсин. Ишингден къууан, муратынга жет, Мурат.
