22 февраля, 2023 - 13:59

Не заманда да жаш адамларыбыз, тюрлю-тюрлю бёлюмледе жетишимли бола, бизни да кёллендиргенлей келедиле. Белгилисича, бир ненча жылдан бери жашла бла къызла, Окъуучуланы битеуроссей предмет олимпиадаларына къатышып, андагъы кёрюмдюлери бла да къууандырадыла. Шауаланы Имран аладан бириди.
Ол Нальчикни 4-чю номерли гимназиясыны 11-чи классыны окъуучусуду. Сагъынылгъан олимпиадагъа экономикадан бла информатикадан къатыша, жетишимли болгъанлай келеди. Эсгерте кетейик, экономика жаны бла быллай сынау эм къыйыннга саналады. Аны бла бирге уа ол школда борчлу предметлени тизмесинде да тюйюлдю.
Энчи Имранны юсюнден айтсагъ а, ол экономиканы бла информатиканы жаратады. Биринчи дерсден аны устазы Алла Феликсовна Хачетлова юйретеди. Информатикадан а ол КъМКъУ-да «Я программист ITV» билим берген курслагъа жюрюйдю. Бош заманында бу сагъынылгъан предметле жаны бла билимин байыкъландырады. Аладан тышында уа, математикагъа, биологиягъа, химиягъа эс бурады.
Олимпиадалада жетишимлерин сагъынсакъ, озгъан окъуу жылда ол экономикадан республикалы даражада биринчи жерге чыкъгъанды. Ары дери уа школда, шахарда да айырмалы болгъанды.
Имран биринчи жер алгъаны бла сынауну къырал даражалы урумуна да къатышыргъа керек эди. Олимпиаданы излемлерине тийишлиликде эки баллы жетмей къалгъанды. Быйыл да ол экономикадан шахар кесегинде экинчи жерни алгъанды. Бу шарт анга республикалы бёлюмюне барыргъа эркинлик береди. Алай бла бу жол таулу жашха экономикадан олимпиаданы къырал даражасында билимин ачыкъларгъа онг чыгъар деген ышаныу барды. Бюгюнлюкде бу сынаулагъа къыстау хазырланады.
Имранны информатикадан жетишимлери да белгилерчадыла. Былтыр шахардагъы урумда биринчи оруннга чыкъгъанды.
Андан тышында да, КъМКъУ къурап бардыргъан Окъуучуланы онунчу ачыкъ Шимал-Кавказ олимпиадаларына къатышханлай турады. Озгъан окъуу жылда информатикадан СКФО-ну школчуларыны арасында экинчи жерге тийишли болгъанды. Бу жол да анга къатышыр мураты барды.
Быйыл экономикадан Окъуучуланы битеуроссей предмет олимпиадаларына Нальчик шахарны тогъуз мектебинден 56 школчу къатышханды. Аланы араларында, белгилегенибизча, Шауа улу да болгъанды.
Имран онбиринчи классны тауусуп, программистге окъургъа сюеди. Жангы программала жарашдырып, адамланы жашауларын игилендирирге излейди.