10 октября, 2023 - 15:34
Кёп болмай Москвада, РФ-ни Жамауат палатасы къурап, «Мен болушурма» деген проектни ахыр федерал кесеги ётгенди. Азаматланы Фарида ары регион конкурсда хорлагъан волонтёрла бла бирге координаторча баргъанды. Ала элтген проект лауреат деген атха, Ыспасха да тийишли болгъанды. Хунерли къыз, университетде дерслерине жюрюгенден, волонтёрлукъ жумушун бардыргъандан сора да, абадан класслада орус тилден бла адабиятдан дерсле береди. Аланы экзаменлеге да хазырлайды. Бюгюн ол бизни ушакъ нёгерибизди.
- Фарида, ары дери уа проектлеринг болгъанмыдыла?
- Волонтёрлукъ иш бла эрттеден кюрешеме. Кёп проектлерим да хайырланылгъандыла. Алгъаракълада уа «Мен болушурма» деген проектни башчысы сёлешип, конкурс ишибиз бла башхаланы да шагъырей этерими тилейди. Сёзсюз, аллай борчну боюнума алыу бек жууаплы эди, болсада аны манга ышаннганларына къууаннганма. Москвагъа Сакъат сабийлени ата-аналарыны битеуроссей организациябызны дагъыда эки келечиси бла баргъанма.
- Бу проектни энчилиги уа недеди?
- Ол толусунлай юйлеринде саусуз, энчи сабийлери болгъан ата-аналагъа болушлукъгъа бурулупду, артыкъда психология жаны бла. Нек дегенде саулукъларында кемчиликлери болгъанланы ата-аналарыны араларында «терк кюйюп» къалгъанла да тюбейдиле. Аланы да ангыларгъа боллукъду: аллай сабийге кёп жылланы ичинде кюннге жыйырма бла тёрт сагъатны тохтаусуз къарап турургъа керекди. «Мен болушурма» деген проектни жашауда бардырыу бла байламлы кёп ата-анагъа эс тапдырылгъанды. Аллай сабийлени халлары да биле-биле иги жанына тюрленеди.
- Кёп жаш адам къатышамыды бу ишге?
- Хау, насыпха. Биз дагъыда волонтёрлагъа психология эмда педагогика жаны бла энчи дерсле жарашдыргъанбыз. Энчи подпроектибиз да барды: «Мен волонтёргъа болушурма» деп. Кеси да «Огъурлу ишлени региону» деген ат бла бардырылгъан битеуроссей конкурсну регион кесегинде хорлагъанды эмда аны федерал кесегине къатышырбыз деп, бек ышанабыз.
- Къаллай бир юйюр бла ишлейсиз бусагъатда?
- Жыйырма. Алай биз аланы санын къыркъгъа жетдирирге деп турабыз. Андан сора да, проектни башха регионлагъа ётдюрюрюбюзню тилеп жазгъанла кёпдюле. Бара-баргъан заманда уа саусуз сабийлеге деп спортну тюрлюлерин да къошар муратлыбыз. Бусагъатда «Мен болушурма» деген социал проектни юсюнден республиканы газетлери, радиосу, телевидениясы да билдиргенлей турадыла. Мындан ары социал сетьледе да айтыллыкъды.
- Къыралны ара шахарына биринчи кере баргъан болурса?
- Хау. Конференцияны ахырында хорлам болдургъанланы саугъалаугъа аталгъан къууанчлы жыйылыу бардыргъандыла. Ызы бла Москва черекде жолоучулукъ къурагъандыла. Хар зат да бошалгъандан сора уа, Къызыл майданда, ВДНХ-да, музейде болгъанма, ара шахарыбызны башха жерлерин да жокълагъанма.
- Фарида, бу жумуш бла кюрешгенинге ыразымыса?
- «Ахшы умутланы назы тереги» акцияны бир заманда да унутурукъ тюйюлме. Къачан да къолумдан келгенича биреуге болушлукъ этерге сюйгенме. Бу жумуш бла кюреше, кесим да насыплы болама. Билемисе, студент жашау ол жаланда дерслеге жюрюу тюйюлдю. Биз билим да ала, аны бла бирге уа жашауну тюрлю-тюрлю болумларына къабыргъабызны жарашдырыргъа юйренебиз.
- Бош заманынг а боламыды, бар эсе, не ишлейсе?
- Бош заман кёп къалмайды. Китап окъургъа бек сюеме. Гитчелигимден да анга атам Алий, анам Лена юйретгендиле. Юйде уллу библиотека къурар муратым да барды. Бюгюнлюкде кёпдю китапларым. Окъумай тапкагъа салмайма. Къара сёзню бегирек жаратама. Михаил Булгаковну чыгъармаларын къайтарып окъургъа да угъай демейме.
- Сен сабийле бла ишлерге эрттеден бери да сюйгенинги билеме.
- Нальчикде 9-чу номерли мектепни алтын майдалгъа бошагъанма. Окъургъа КъМКъУ-ну педагогика, психология эмда физкультура-спорт жаны бла билим бериу институтха документлерими бергеними эшитгенлеринде, кёп танышларым, жууукъларым, устазларым да жаратмагъан эдиле. Ара шахаргъа бар деп.
Алай мен юйден узакъгъа кетиуню дурус кёрмегенме. Устазлыкъны уа гитчелигимден сюйгеним себепли, бир такъыйкъагъа да сокъуранмагъанма сайлауума. Аны да къызыл дипломгъа бошап чыкъгъанма.
- Жууукъ заманнга муратларынгы да ачыкъласанг эди.
- Бусагъатда магистратурада окъуй турама. Иишлеген да этеме. Устазлыкъ, волонтёрлукъ ишими да андан ары бардырыргъа деп турама.
Ушакъны Холаланы Марзият бардыргъанды.
