14 мая, 2024 - 13:59
Хэку зауэшхуэм и зэманым хахуагъэрэ лIыгъэрэ къэзыгъэлъэгъуахэм ящыщщ медицинэм и лэжьакIуэхэри. Армэ Плъыжьым и Дзэ-медицинэ управленэ нэхъыщхьэм и унафэм ипкъ иткIэ, къэралым и медицинэ IэнатIэм и къалэн нэхъыщхьэт уIэгъэ хъуа зауэлIхэр къызэфIэгъэувэжыныр. Апхуэдэу медицинэ лэжьакIуэхэм унафэ хуащIат зауэ губгъуэм уIэгъэ щыхъуа нэмыцэхэми дэIэпыкъуэгъу яхуэхъуну.
А лъэхъэнэм совет дохутырхэр сэбэп яхуэхъуащ зауэ IэнатIэм Iуту сэлэт мелуан 17-м. Хэку зауэшхуэм хэкIуэдащ медицинэ лэжьакIуэу мин 85-м нэблагъэ: абыхэм ящыщу мини 5-р дохутырщ, мини 9-р курыт IэщIагъэ зиIэ медицинэ лэжьакIуэщ, мин 71-р санитар инструкторхэмрэ санитархэмрэщ. 1941-1942 гъэхэм КъухьэпIэ фронтым хъыбарыншэу щыкIуэдащ зауэ IэнатIэм Iухьа дохутырхэм я процент 90-р, Ипщэ-къухьэпIэ фронтым - проценти 100-м нэблагъэ.
Зэрахьа лIыгъэхэм папщIэ Совет Союзым и ЛIыхъужь цIэр фIащащ дохутыр 49-м, сэлэтхэм папщIэ ягъэува ЩIыхьым и орденым и кавалер хъуащ медицинэ лэжьакIуэу 18. Дзэ дохутырхэу мини 116-м щIигъум, узыншагъэр хъумэнымкIэ IэнатIэм и лэжьакIуэ мин 30-м СССР-м и медалхэмрэ орденхэмкIэ ягъэпэжащ.
Дзэ госпиталу, медико-санитар батальону 41-м Бэракъ Плъыжь, Вагъуэ Плъыжь орденхэр иратащ.
Санитархэм щхьэкIи дамыгъэ щхьэхуэхэр щыIащ: уIэгъэ хъуа сэлэт 15 зэрызэщIэузэдауэ зауэ губгъуэм къизыхыжа санитарым «Зауэм щызэрихьа лIыгъэм папщIэ» медалыр иратащ, уIэгъэ 25-м сэбэп яхуэхъуфам – Вагъуэ Плъыжь орденыр, сэлэт 40 къезыгъэлам Бэракъ Плъыжь орденыр, сэлэт 80 зэхэуэ гуащIэм къыхэзыхам – Лениным и орденыр.
