14 мая, 2024 - 10:46
Бюгюн биз Абшаланы Махмутну бла Башийланы Сакинатны къызы Аминаны юсюнден айтыргъа сюебиз. Ол кеси эм уллу малкъар элибизде – Хасанияда – жашагъанды, Огъары Малкъарда Эндрейланы Керим бла бир юйюр къурагъанды, эки къызчыгъын Фатиманы бла Алиманы ёсдюреди.
- Анабыз юйде не ишден да артха турмазгъа юйретгенди. Бахчагъа, малгъа да къараргъа болушдура, сютден этилген таулу ашарыкъланы жарашдырыуну энчиликлерине тюшюндюргенди. Аммабыз гитчелигимде окъуна тылы басаргъа юйретгенди. Анамы ата-анасы да кёп затха тюшюндюргендиле. Аппабыз Дугуну сейир китаплары бардыла. Бизге, туудукълагъа, окъууну, китапланы да магъаналарын ол юйретгенди, - дейди ушакъ нёгерим.
Амина Хасанияда 16-чы номерли школну бошап, Нальчикде медицина колледжни «Багъыу иш» бёлюмюнде окъугъанды. Ызы бла шахарны 2-чи номерли клиникалы больницасыны «Урология» бёлюмюнде эм приёмныйде да ишлегенди. Анда ишлей тургъанлай, КъМКъУ-ну инженер-технология факультетини «Аш-азыкъ продуктла жаны бла инженер-технолог» бёлюмюню бакалавриатын, ызы бла уа университетни «Педагогикалы психология» факультетини магистратурасын жетишимли тауусханды. Ол ишлеген жеринде ыспасха, ыразылыкъ сёзлеге тийишли болгъанды. Психология ызда окъургъа сюйгени да аны бла байламлы эди – саусузланы кеслери неда аланы жууукълары бла сёлеше туруп, билими себеплик этеригине ийнаннганды. Аны алайлыгъына иш юсюнде кёп кере тюшюннгенди.
Амина эшиу эшерге да гитчелигинден тюшюннгенди. Ол жумушха анасы Сакинат юйретген эди, жаннетли болсун. Эм алгъа уа эки, тёрт ийне бла сабий чындайладан башлагъанды. Бир кесекден анасына женгсиз габарала эшерге да болушханды. Бюгюнлюкде уа ол кимге да хычыуун кёрюннген илляула, башха затла да эшеди. Илляуланы уа «Гималая Долфин Беби» деген халыдан ыргъакъ бла этеди. Ол жюнден этилмегенликге, къолда тутаргъа жумушакъды эмда хычыуунду. Эм игиси уа – ала сабийде аллергиялы аууруланы къозгъамайдыла. Халы кеси да Тюркде ийириледи.
- Эм алгъа быллай илляуланы телефонда эслейме. Ол манга алай ариу кёрюннген эди! Ютубда излеп, къарап, ала бла байламлы мастер-классланы да табып, алай бла тюшюннгенме. Дагъыда ол илляуланы тынгылы этилгенлерине бюсюрегенме, - дейди Амина къол хунерини башлагъан кезиуюню юсюнден.
Бек биринчи уа, ол къызчыкъларына къоянчыкъ этген эди. Сабийлени анга жюреклери бла къууаннганларын, аны бла ойнаргъа бютюн сюйгенлерин да эслейди. Ол этген гинжисин интернетде салады, аны бирсиле да кёредиле, алай бла Аминаны хунерин башхала да биледиле. Гинжиледен сора да, сабийни бёлерге, неда жукълагъан кезиуюнде юсюне жабаргъа жабыучукъланы, жууургъанчыкъланы, юй тюбюнде ойнагъанларында сууукъ болмазча кюйюзчюклени да эшеди. Аланы да тиширыула сюйюп аладыла. Быллай жабыучукъланы не ийне, не ыргъакъ хайырланмай, халыны кесини юсюнде болгъан илгиклени болушлукълары бла аны биринден башхасына ётдюрюп, алай этеди. Алагъа уа «Ализе Пуффи» халыны хайырланады.
Бу жумушну башлагъан кезиуюнде ол алай тынч табылмагъанын, энди уа аны къайда да сатып алыргъа боллукъду. Къол хунерни бу тюрлюсю айнырына аналыкъ насыбы себеплик этген сунады. Аны андан ары айныта, сабийчиклеге Жангы жылда неда башха байрамлада киерге боллукъ костюмчукъланы, илляуланы, кийимлени да жыярча уллу четенлени, жаш къызчыкълагъа уа къолда жюрютген ууакъ кереклерине гитче косметичкаланы эше билирге юйренир мураты барды. Башха тюрлю техникагъа тюшюнюрге да.
Аны дагъыда хунерини айнырына ыннасы Зухура да (анасыны анасы) себеплик этгенди. Къумачларындан къалгъан журунладан гинжилерине жыйрыкъчыкъла тигерге юйретип, эм алгъа аланы халы бла жёрмелетдирип, ызы бла уа машина бла ишлерге тюшюндюргенди. Баям, ол эслеген эди туудугъуну къолдан усталыгъы боллугъун.
Ушакъ нёгерибиз ариу сапынла бишириуню технологиясын да биледи. Ол аны журналладан биринде окъуп юйреннгенди. Химиялы затланы къошмай, балны, зейтун (оливка) эмда чёплеу жауланы, ариу ийисли гокка хансланы да хайырланады. Эм алгъа уа ол къызыл, кеси да жюрек суратлы сапынны биширип, аны анасына саугъалап къууандыргъан эди.
Жаш ана къызчыкъларыны хунерлерин айнытыугъа эс бурады, ахшы адамла болуп, ариу тёрелерибизге тийишлиликде, ана тиллерин да билип ёсерлерин излейди. Фатимачыкъгъа малкъар, орус тилледе да назмуланы кёлден билип, ариу окъугъанчыгъы бла къууандырады. Алимачыкъгъа алыкъа жылчыкъ болады. Къызчыкъла сабий садха энди жюрюрюкдюле.
Амина инсан эм алгъа тюзлюкню жолунда барыргъа, ачыкъ ниетли болургъа, адамлыкъ ышанларын сакълагъанлай, жамауатха хурмет бере, кеси да анга тийишли бола жашаргъа кереклисин чертеди. Кеси ол ызда юйреннген жаш ана юйюрюн да анга кёре тюшюндюрюр, аланы миллетлерин, ата-аналарын, ёмюрледен келген ниет хазнабызны да багъалагъан адамла этип ёсдюрюр деп, ийнанырыгъыбыз келеди.
