22 мая, 2024 - 10:19
Озгъан жылда республиканы билим бериу махкемелеринде белгилеп айтырча аслам жангычылыкъ, жетишим да бола келгенди. Аланы кёбюсюню юслеринден кезиуюнде биз газетибизде билдиргенлей да тургъанбыз. Сёз ючюн, устазларыбыз, регион даражалы эришиуледен тышында да, сынамларын ачыкълай, бет жарыкълы бола келедиле. Алай бла Сюйдюмланы Элдар «Жылны устазы – 2023» усталыкъ конкурсну республикалы урумунда хорлам болдуруп, аны къыралда бардырылгъан кесегине да къатышханды. Ол «Кюн шахар» сабий чыгъармачылыкъ академияны хунерлиле жюрюген лицейинде физикадан окъутады. Болдургъан жетишими ючюн КъМР-ни Башчысы Казбек Коковну алгъаракъда къабыл кёрюлген оноууна тийишлиликде аны премиясы бла саугъаланнганды.
Мектеплени юслеринден айтхан заманда, регионну школларыны бир-бирлерине Сабийликни, юйюрню эмда юйретиуню илму институтуну инновациялы майданлары деген даража берилгенди. Аллай даражагъа «Окъуучуну сёлешиу тилни амаллары бла айнытыу» ызда Нальчикни генерал Зокаланы Валерий атлы сегизинчи номерли мектеби да тийишли болгъанды.
Аллай окъуу юйлени санында дагъыда жыйырма жетинчи номерли школ да барды. Анда уа «Билим берген организацияны къуралыуу юйретиуню мурдоруча» деген ызгъа кёре ишлерикдиле. Эсигизге салайыкъ, федерал жангычы майданнга бурулур ючюн мектеплеге уллу конкурсха къатышыргъа тюшгенди. Анда Россейни 85 регионундан бла Таджикистандан 1500 школну келечиси кесини хунерин ачыкълагъанды. Алай бла эришиуде жетишимли болгъаннга 267 махкеме саналгъанды. Хар инновациялы майдан бла да институт 2024 жылны декабрь айыны отузунчусуна дери бирге ишлерге деген келишимле хазырлагъанды эмда ала къабыл кёрюлгендиле.
Окъуучуланы жетишимлерини юслеринден айтхан заманда уа, Нальчикни онтёртюнчю номерли гимназиясын бошагъан Кючюкланы Маратны школчулагъа «Умницы и умники» Битеуроссей гуманитар телевизор олимпиадасыны отуз биринчи кезиуюню ахыр урумуна къатышып, жетишим да болдургъаны барыбызны да къууандыргъанды.
Дагъыда бу гимназияны окъуучусу Хаджиланы Ренат профильли математикадан Бир къыраллы сынауда жюз балл алгъанды. Аллай эсепге бу дерсден озгъан жылда республикада ол жаланда кеси тийишли болгъанын да чертирчады.
Республикабызны школларын алып айтханда, андан тышында да, ара шахарыбызны жыйырманчы номерли мектебин айтырчады. Аны келечилери этнокультура жаны бла билим бериуден Ана тиллени инсти туту бардыргъан битеуроссей эришиуню ючюнчю даражалы лауреатлары болгъандыла эмда багъалы саугъа бла белгиленнгендиле. Бу конкурсха къыралны 650 регионундан 65 махкеме къатышханды.
Кёп болмай а, Жанхотия элни устазлары «Уллу къыра лны командасы» деген уста лыкъ метапредметли олимпиаданы регион урумунда хорлагъан эдиле. Ол шарт да бизни кёллендирмей къоймагъанды. Ызы бла уа Апсууаланы Алий (физикадан окъутады, къауумну башчысы), педагог-библиотекачы Жаболаны Зайнаф, химиядан дерсле бергенле Къартлыкъланы Светлана бла Радима Кодзокова – олимпиаданы ахыр урумуна Москвада педагогика университетде къатышхандыла.
Аны республикалы кезиуюнде кеслерини сынамларын ачыкълай, къыркъ соруугъа жууапла бергендиле. Ала уа адабиятдан, санатдан, химиядан, географиядан, тарыхдан, физикадан, башха бёлюмледен да болгъандыла. Алай бла, бизни республикабызны къаууму, башхача айтханда уа, Жанхотияны Малкъарланы Хамзат атлы битеулю билим берген мектебинден устазла саулай да къыралдан 83 команданы арасында эм ахшы онусуну тизмесине тюшгендиле эмда дипломла бла белгиленнгендиле. Аны бла уа бизни тау эллерибизде ишлерин сюйген, билимли, окъуулу, кёз къарамлары да кенг болгъан сынамлы устазла барлыкъларына дагъыда бир кере шагъатлыкъ этгендиле.
