22 мая, 2024 - 11:55
Журтубузну ариу жерлерини юсюнден кезиулю хапарыбызда Дых тауну эсгерликбиз. Ол Бызынгы элни баш жанынданды. Бийиклиги бла къуру Кавказда угъай, битеу Россейде да экинчи жерде барады, ол жаны бла жаланда Минги таугъа оздурады. Болсада ол тикди. Къаягъа ёрлеучюлени анга сейирлери уллу болгъанлыкъгъа, анга чыгъаргъа базыннганла аздыла.
Ары чынг аллын ингилизли къаячы Альберт Маммери 1888 жылда ёрлегенди дейдиле.
Совет власть орналгъандансора 1931 жылда белгили оруслу къаячы Виталий Абалаков юйдегиси эм къарындашы бла миннгенди аны башына. Бюгюнлюкде да бардыла Дых таугъа ёрлерге сюйгенле. Ала Нальчикден Бызынгыгъа келедиле. Андан оналты километр ёрге барадыла. Анда альплагерьде тохтайдыла. Андан сора таугъа ёрлеуню оноуун этедиле. Бу тийреде бийиклиги 5 минг метрден атлагъан дагъыда беш тау барды.
