28 мая, 2024 - 11:15
Огъары Бахсанда жашагъан Жаппуланы Аслан бла Владлена юч сабий ёсдюредиле. Аланы хунерлерин айнытыр ючюн ыйыкъгъа бир кере Нальчикде «RT models» школгъа жюрютедиле. Владленаны (Лада) кесини да хар ишге къолу жарашады, уста тигиучюдю, жырчыды, устазды. Бюгюн ол бизни ушакъ нёгерибизди.
- Лада, таулу юйюрге къалай тюшгенсе?
- Аслан бла Интернетде танышханбыз. Манга онсегиз жыл бола эди. Батыр заманым. Юйюрюнде оюмун билдирип, башха миллетли болгъанымы да ангылатып, эркинлик алгъандан сора келтиргенди мени. Къайын атам бла анам Жаппуланы Дахир бла Фатима бек ариу кёргендиле, юй жумушха, жууукъ-ахлулагъа намыс берирге да юйретгендиле.
- Фахмунг а къалай ачылгъанды?
- Анам тигиучюдю, атам да суратчыды. Хунер аладан кёчген болур. Мен да тигерге юйретген колледжни бошагъанма. Биринчи заманда юйюр жумушла бла булжугъанма. Сабийле бираз ёсгенлеринден сора уа, усталыгъым кесин таныта башлагъанды. Алгъа конфетлени саугъаланы чулгъагъан къагъытла бла тышлап кёреме. Тюрсюнлю къаты къагъытдан, гюлле этип, аланы жабышдырып, кесибизни тюкенибизде сата эдим. Ызы бла уллу гюлню ичинде, кечеги чыракъ жанарча этгенме. Социал сетьлени хайыры бла ишлерими кёрюп, заказла этип, бош заманым болмай ишлегенме.
- Бюгюнлюкде сен кийимле бичесе, аны уа къалай башлагъанса?
- Бир жол алыучуларымдан бири, сабийни ёрге жанына накъышла салдырыргъа келеди. Ала бла ушакъ эте, къызчыгъы Нальчикде модельле хазырлагъан «RT models» школгъа жюрюгенин айтады. Биз да сабийлени ары берирге оноулашабыз. Анда санларын тюз тутаргъа, ариу атларгъа, актёр усталыкъгъа, шатык сёлеширге да юйретедиле. Тюрлю-тюрлю темалагъа жоралап, сурат алыу жаны бла да мастер-классла бардыргъандыла. Мен а, ол кезиуде тиге башлагъанма, сабийлерим да кесим тикген кийимледе суратха тюшселе сюйгенме. Теманы алгъаракъ билдире эдиле. Ол кезиуню ичинде экисине да кийимле тикгенме. Ала мени биринчи атламларым эдиле.
- Энчи белгинг барды: LADASWEET. Бу сёзню магъанасы неди?
- Лада атымы къысха тюрлюсюдю. SWEET деген а ингилиз тилден «татлы», «аламат», «сейирлик» деп кёчюрюледи. Мен биринчи конфетле бла ишлеп башлагъанымда, «татлы» деген сёзню тап кёргенме атыма къошаргъа. Бусагъатда кесим тикген кийимлеге, бохчалагъа да бу белгини салама.
- Биринчи кёрмючюнг а къайда болгъанды?
- «Шато Эркен» арада сабийлени чыгъышлары болгъан эди. Мен анда сахнагъа чыгъарыкъланы кийиндирип тургъанма. Андан къарап, залдагъы модельерлени кёрюп, бек сукълана эдим. Сора бир ауукъ замандан «RT models» школну таматасы Розанна Тличежеваны башчылыгъы бла Нальчикде «RT Fаshion day» проектге къатышама. Москвада, Владикавказда, дагъыда башха шахарлада бардырылгъан кёрмючлеге къатышыучума. Манга ол уллу жетишимди. Кёрмючледе мен тикген кийим сатылса, аны орунуна башхасын тигеме. Европалы кийимле тикгенлигиме, миллет энчиликни да унутмайма. Сёз ючюн, башхала сабийлени билеклерин, бутларын жалан этип чыгъарадыла сахнагъа. Мен алай эталмайма.
- Къалай жетишесе бу къадар ишни бирден бардырыргъа?
- Айтханымча, къайынларым иги адамладыла. Къайын анам, кеси да элни администрациясында ишлегени себепли, тиширыуну къаллай жюгю болгъанын ангылайды. Хар ким юйде эталгъан жумушуна къарайды. Алай бла сюйген ишиме заман табама. Алгъаракълада уа ашханаланы къабыргъаларында тауларыбызны суратларын ишлерге чакъыргъан эдиле. Ол сынамны кесим да жаратханма. Сора «Панорама» кафени уа тепсилеринде тауларыбызны тёппелерин суратлагъанма. Аланы акрил бояу бла ишлеп, ол къуругъандан сора уа, лак сюртгенбиз. Андан бери ненча жыл озду, алай тепсиле жангылай турадыла, ариу сакъланнгандыла.
- Сабийле бла тюбешиулерингде къаллай дерсле бардыраса?
- Ташлада, юс кийимледе, бёркледе, адырлада да энчи бояула бла жазыу этерге, сурат ишлерге юйренедиле сабийле. Къоллары бла салгъан накъышлы кийимлени да бек жаратадыла. Сора, инжиле бла ишлерге, гюлле этерге, плакатлада суратла ишлерге, гинжиле эшерге да юйретеме.
Аслан да бизни бла бирге таулада, ёзенледе да аллай сыфатлы сурат кёрмючлеге къатышханды. Быйылдан башлап Тамирланны да элтебиз модельлени школуна. Хар жылдан билимибизни ёсдюребиз, жангы затлагъа да юйренебиз. Асланнга ыразылыгъымы билдирирге сюеме. Не жаны бла да билеклик этип, кёллендирип, тамблагъы кюннге ийнандыргъаны ючюн. Тиширыугъа ол бек уллу насыпды.
- Жаш аналагъа не айталлыкъса?
- Сабийигизни хунерин ачыкълап, айнытыргъа кюрешигиз. Алай бла, ёсе баргъаны сайын, анга тынчыракъ боллукъду сюйген жумушу бла кюреширге. Адам жаратхан заты бла кюрешсе, кёлю жарыкъ болады. Сабийлерим артда да модель иш бла кюреширге кёлленипдиле. Ким биледи, алыкъа оюмларын алышыргъа да болурла.
