4 июня, 2024 - 13:59
Мектепни бошай тургъан окъуучула кеслерине къаллай усталыкъны сайлагъанларыны, аны халкъына не магъанасы боллугъуну юсюнден соруулагъа Элбрус районну бир къауум жаш адамы былай жууапла бергендиле:
ДЖАППУЛАНЫ Элдар, Терс-Къолда школну окъуучусу:
- Юриспруденцияны сайлагъанма. Алгъаракълада жашаууму туризм бла байларгъа да сюе эдим. Заман келгенде уа, терен сагъышланып, айтханымча, юрист болургъа таукелленнгенме. Бу сайлауда юристлени хазырлагъан факультетни 4-чю курсну бошай тургъан эгечими усталыгъына сюймеклиги юлгю болгъанды.
Кёп тюрлю даулашлагъа къатышып, тюзню-терсни айыра биллигим кёллендиреди. Кеслерини эркинликлерин билмей жашагъан жамауатха тюзлюк жаны бла болушлукъ этерге сюеме. Бу усталыкъ кеси аллына сейир болгъаны бла чекленип къалмай, адамланы жашауларын игиге тюрлендирирге онг береди.
ГЕЖАЛАНЫ Малика, Огъары Басханда школну окъуучусу:
- Окъууну бошай туруп хар адам да иш усталыкъны сайлауда терен сагъышлы болады. Гитче сабийчиклени муратларын мен бек жаратама. Ала космонавт, жырчы, артист болургъа сюедиле. Аламат! Абаданла болгъанда уа, ич дуниянга келишген иш усталыкъны сайлау къаллай жууаплы болгъанын ангылайбыз. Бу сайлауда саулугъубузну, фахмубузну, билимибизни, къолайыбызны да магъанасы бек уллу болгъанын унутургъа жарамайды.
Мен да, аланы эсге ала, тишчи болургъа сюйгеними ангылагъанма. Бу усталыкъ адамны саулугъу бла байламлы болгъаны себепли, хар заманда да кереклиди, хакъы да иги сунама, къылыгъымы энчиликлерине да келишеди. Сёз ючюн, тутхан ишими ахырына жетдире билеме, чыдамлыма, менден умут этгенлеге болушургъа сюеме.
Тиш докторгъа барыу абаданлагъа, сабийлеге да къоркъууду, жарсыуду. Ол къоркъуудан саусузну чыгъара билиу а врачны энчи фахмусуду. Медицина факультетде окъугъан ал жылларымда, ким биледи, оюмуму алышыргъа да болурма, алай медицинаны къайсы тюрлюсюн сайласам да, ол саусузлагъа болушуу бла байламлы боллугъу уа шартды.
ЖЕТТЕЛАНЫ Дамира, Тырныауузда Отарланы Керим атлы 1-чи номерли лицейни окъуучусу:
- Медицинагъа барыргъа сабийликден да сюйгенме. Бизни жашауубузда эм магъаналы усталыкъгъа врачлыкъны санайма. Быллай адамланы кёллери ачыкъ, жюреклери жумушакъ, жан аурута билгенле болургъа керекдиле. Жарсыугъа, бары да бирча болмазла, алай игилеге ушаргъа итинирикме.
Врачланы хар затны да эталгъан, акъыллары, кючлери да жетген жомакъдагъы жигитле бла тенглешдиреме. Хар адам да тутхан ишин тынгылы эте билсе, анга излем болгъанлай турады. Мен да аллай врач болур муратдама. Жылдан-жылгъа жашау къыйын бола баргъаны себепли, адамланы саулукълары къарыусузланады. Къолумдан келгенича, саусузлагъа себеплик этерге сюеме. Миллетиме, жамауатыма жарагъан врач болалсам, муратым толлукъду.
ЭТЕЗЛАНЫ Джаннет, Тырныауузда 5-чи номерли гимназияны окъуучусу:
- Бизни къайсыбыз да къуру кеслерине угъай, жамауатха да болушлукъ берик иш усталыкъны сайларгъа керекбиз. Баям, юрист болсам, аллай амалым боллукъ сунама. Адамны эркинлигинден сора да, борчлары болгъанын билдирирге юристлени борчуду.
«Эркинликсиз борч болмайды, борчсуз эркинлик да болмайды!» - дегенди Карл Маркс. Бу оюмда тюзлюкге итиниу болургъа кереклисин ангылайма. Адамла не тюрлю жашау болумлагъа тюшселе да, аны терслигин ангылап, тюзлюкге ийнандыра билирге сюеме. Алай бла, къырал къуллукъчу болургъады муратым. Не усталыкъда да инсан, биринчиден, Ата журтуна, экинчиден а, къыралына болушлукъ, себеплик этерге керекди.
Жашауну излемлери да заманнга кёре тюрленедиле. Ким биледи, жашаугъа кёз къарамым алыкъа тюрленирик эсе да, алай миллетим мени бла ёхтемленирча специалист болургъа уа кюреширикме.
