11 июня, 2024 - 08:22
Мектепни бошай тургъан окъуучула кеслерине къаллай усталыкъны сайлагъанларыны, аны халкъына не магъанасы боллугъуну юсюнден соруулагъа Элбрус районну бир къауум жаш адамы былай жууапла бергендиле:
БАЙЗУЛЛАЛАНЫ Мариям,Тырныауузда 3-чю номерли школну окъуучусу:
- Москвада Ломоносов атлы къырал университетни юристлени хазырлагъан факультетине кирирге сюеме. Гитчелигимден окъуна тарыхдан дерсни бек жаратама. Абадан класслада уа – обществознанияны да. Аны себепли кесими бу усталыкъда жетишимли олаллыкъ сунама. Законланы окъуп билирге, аланы жашауда хайырланыугъа уллу эс бурама. Сёз ючюн, бир бериуге къарасам, андагъы жигитлени право жаны бла сюзерге сюеме.
АХМАТЛАНЫ Тамара, В.Г. Кузнецов атлы 6-чы номерли школну окъуучусу:
- Бусагъатда, шуёхларымча, мен да уллу сайлауну аллында турама. Жашау жолума врачлыкъны сайлагъанма. Мен биреуленни окъуна жашауун сакълаялсам, аны саулгъун сакълаугъа себеплик эталсам, насыплыгъа санаяллыкъма кесими. Андан сора да, медицинада болгъан адам тохтаусуз окъугъанлай, билимин айнытханлай, жангы амаллагъа юйреннгенлей турады. Ол а бек сейирди.
Медицина кеси аллына бек къыйын усталыкъ болса да, сени аз да билимингден бла оноуунгдан адамны жашауу тюрленириги, бек уллу борч салады аллымда. Бет жарыкълы урунуп, адамланы ыразылыкъларына тийишли болалсам, насыплыма.
КЕТЕНЧИЛАНЫ Керим,Тырныауузда 3-чю номерли школну окъуучусу:
- Бауман атлы гуманитар-техникалы университетге кирирге сюеме муратыма жеталсам. Анда уа робототехника факультетни сайлагъанма. Нек десегиз, манга физика бла математика бек сейирдиле. Келе тургъан заманлада уа, окъууну бошагъандан сора, роботланы жарашдырып жыйгъан конструктор неда интеллектуал системаланы къураучу болуп ишлерге сюеме. Дагъыда, миллетиме бир тюрлю бир къошумчулукъ этер муратда уа, илму ишлени малкъар тилге кёчюрюрге сюеме.
КЪАРТЛЫКЪЛАНЫ Самина, Быллымда школну окъуучусу:
- Мен да медицинаны сайлагъанма, туугъан къарындашым ол жаны бла юлгю болгъанды. Адамланы саулукъларына себеплик этиуню жашаууму баш борчуна анарыкъма. Не заманда да саусузну саулугъун игилендириуге, анга жан аурута билиуге, тюз багъыу этип, жашауун къоруулаугъа энчи эс бурлукъма. 5-чи классдан башлап, кесими бу усталыкъгъа хазырлайма.
Къыйын усталыкъ болса да, жашау къутхаргъаннга жетген огъурлулукъ жокъду. Адам сюйген ишинде жетишимли болур ючюн, ол аны къанына сингерге керекди. Врач болуу – ол иш усталыкъдан да кёпдю, адамны жюрегини халыды ол. Кёлю бла багъыу эте билген врачла хурметлидиле. Аллайланы санында болуп, ариу муратыма жетерме деп ышанама.
ЧЫПЧЫКЪЛАНЫ Ачемез, Бедикде школну окъуучусу:
- Школда окъуу жылларым бошала турадыла, аны себепли къайсы усталыкъны сайларыма сагъыш этеме. Адам улу жашагъан къадарда, хар усталыкъ да кереклиди, магъаналыды. Кесими юсюмден айтханда уа, жаным адабиятха, журналистликге тартады. Школда окъугъан кезиуюмде кёп эришиулеге къатышып, алчы жерлеге тийишли болгъанма. Таулу жазыучуланы чыгъармаларын орус тилден таучагъа кёчюрюп, алчы жерле да алгъанма. Китап сюйгенлени биригиулери жыл сайын жазыучуланы юбилейлерине атап бардыргъан эришиулеге сюйюп къатышама.
Былтыр Чыпчыкъланы Борисни «Возвращайся свободным» деген хапарын малкъар тилге кёчюрюп, алчыланы санында болгъанма. Быйыл да Беппайланы Муталипни «Ортар», «Бедик», «Поэтме мен» деген назмуларын орус тилге кёчюрюп ашыргъанма да, аланы эсеплери апрельде чыгъарыкъдыла. Бек сакълайма. Кесими да Москвада М.Горький атлы адабият институтха кирир муратым барды.
