24 июня, 2024 - 15:34
Школланы бошарыкъ жашла бла къызла, кеслерине усталыкъны сайлай, анга кере уа ол жаны бла берилирге тийишли сынаулагъа хазырланнган кезиу, жаланда аланы кеслерине угъай, бирсилеге да бир жашырын умутланы заманычады. Быйыл да жаш телю, алгъа таукел къарай, кесини билимин окъуу юйледе есдюрюп, жамауатны айныууна къошумчулукъ этер муратдады. Биз а аланы бир къауумундан къайры окъургъа барыргъа сюйгенлерини, Бир къырал экзаменлерини юслеринден соргъанбыз.
МУСУКЛАНЫ Джамиля, Огъары Жемталаны Чубокланы Алий атлы битеулю билим берген мектеби:
- Къабарты-Малкъар къырал университетни роман-герман филология факультетини лингвистика ызына кирирге мурат этип турама. Адам кесини ана тилинден тышында да бир башханы иги билсе, анда шатык да селешсе, аны жашауу сейир да боллукъду, кесине иш табаргъа онглары да кеп боллукъдула деп сунама. Окъууну бошап, эм алгъа устазлыкъда сынам жыйышдырыргъа сюеме. Ызы бла уа, умутум толса, тилманч болур акъылдама. Ана тилими бек иги билеме деп айталмайма. Жарсыугъа, къартла селешгенде хайырланнган бир-бир сезлени магъаналарын ангыламай къыйналама, алай эсе да, соргъан а этеме. Аланы артда гитче къарындашыма айтып да юйретеме. Юйде барыбыз да тауча селешебиз. Бюгюнлюкде уа, тенглеримча, сынаулагъа къыстау хазырланама. Борчлу ЕГЭ-леден тышында ингилиз тилден бла обществознаниядан берликме.
Ингилизчадан, билесиз, экзаменле эки кюнню ичинде болуучудула. «Жазма» тюрлюсюнде къыйналлыкъма деп сунмайма. «Селешиу» кесегинде уа кеп затха теренирек тюшюнюр ючюн, Нальчикге репетиторгъа да барама. Бирси сынауладан а жюрюмейме алагъа. Школубузда дерслени кезиулеринде иги юйретедиле да, ол билимиме ышанып турама.
ТЕБЕРДИЛАНЫ Залина, Жанхотияны Малкъарланы Хамзат атлы битеулю билим берген школу:
- Гитчелигимден да малкъар тилден бла адабиятдан эришиулеге, артда олимпиадалагъа да къатыша тургъаным КъМКъУ-ну къарачай-малкъар филология белюмюне окъуугъа кирир муратха келтиргенди. Юйде да бу сайлауума ыразы болгъандыла. Окъууну бошагъандан сора ана тилибизден юйретген устаз болуп ишлесем да, угъай дерик тюйюлме. Нек дегенде эки тамата эгечим да элибизде устазладыла, ала да юлгюдюле манга. Бюгюнлюкде ана тиллерин, миллет адет-терелерин, тарыхларын билгенлени айныр онглары бютюнда барды. Манга уа бу затла барысы да сейирдиле.
Эм алгъа тукъум терекни хазырлап, аллай эришиуге къатышхан эдим да, ол эсимде бек къалгъанды, малкъар тилден олимпиалалада жетишимли болгъанлай келгенме. Кеп болмай республика даражалы урумда экинчи жерге чыкъгъанма. Бу жанына сейирим ачылырына устазларым Зухура Абдуловна бла Зайнаф Хызыровна себеплик этгенлери, ала ишлерине усталыкъ кезден къарагъанлары ючюн хурметим уллуду. Бу белюмге окъуугъа кирир ючюн, орус литературадан ЕГЭ-ни берирге керек болады. Ол къыйыннга саналады да, анга бегирек хазырланама. Алай эсе да, репетиторлагъа жюрюмейме. Хар дерсден да кесим Интернетни болушлугъу бла хазырланама. Школубузда да бизни тийишли даражада юйретедиле.