2 июля, 2024 - 08:55
Быйыл Нальчикни отуз экинчи номерли битеулю билим берген мектебини окъуучусу Мисирланы Малика химиядан жюз балл алгъаны белгили болгъанды. Бу дерсден ЕГЭ-ни сабийле биринчи жазгъандыла, ахыр къонгуроугъа дери окъуна.
Малика биринчи классдан да жаланда «бешлеге» окъугъанды. Ингилиз тилни, обществознанияны, химияны дерслерин артыкъда бек сюйгенди. Обществознаниядан устазы уа ыннасы Атабийланы Фатимат Хамангериевнады. Алай эсе да, ол анга дерслеринде, школну юйретиу ишинде да билимни, низамны да къаты сурагъанды.
- Химия биринчи сынауубуз болгъанлыкъгъа, анга билимиме ышаныулукъ бла баргъанма. Ол кеси да тогъузунчу номерли школда болгъан эди. Алай эсе да, жюз балл аллыкъма деп, эсимде да жокъ эди. Ол жаланда мени энчи жетишимим тюйюлдю. Бир жылны ичинде репетитор Лариса Петровна Борисовагъа къауум бла бирге жюрюп юйреннгенме. Ол сынамы болгъан, окъуулу, билимин да жаш тёлюден аямагъан адамды. Профессионал даражасы ючюн хурмет этип, анга жюрек ыразылыгъымы да билдиреме, - дегенди.
Бютюнда бег а класс башчысы Ольга Владимировна Молчанова къууаннганды. Ол орус тилден репетиторлукъ этип да тургъанды. Малика орус тилге баргъанында апчыгъанын да жашырмагъанды.
Къызчыкъны мектепде окъугъан кезиуюнде жетишимлери кёп болгъандыла. Ол дайым да Окъуучуланы битеуроссей дерс олимпиадаларына къатышханлай тургъанды. Сёз ючюн, озгъан окъуу жылда химиядан бу эришиуню регион даражалы урумунда биринчи жерни алгъанды.
Ол ана тилибизде шатык сёлешгенин да белгилейбиз. Бу дерсден олимпиадада да былтыр республикада биринчи оруннга тийишли болуп, регионну Башчысы Казбек Коковну премиясы бла да саугъаланнганды. Быйыл да малкъар тилден Нальчик шахар округну мектеплерини окъуучуларыны арасында алчы болгъанды. Андан сора да, озгъан жылда къырал даражалы дерс олимпиадада тарыхдан призёр болгъанды.
Аны усталыкъ сайлаууна уа анасы Марина юлгю болгъанды. Ол «Элифия» клиникада врачды. Аны къалай ишлегенин сабийлигинден да кёре келген къызчыгъ а стоматолог болургъа сюеди. КъМКъУ-ну бу жаны бла юйретген институтуна окъургъа кирип, билим алып, республикада ишлер муратлыды.
Бош заманында уа тыш къыраллы тиллеге юйренеди. Бютюнда медицинаны сайлагъаннга бюгюнлюкде ингилиз тилни билгенлери ахшы себеплик болады.
