2 июля, 2024 - 09:12
Жангы къуралгъан «Биринчилени атламлары» деген биригиу жыл сайын онеки ызгъа кёре тюрлю-тюрлю эришиуле къурап бардырады. Кёп окъуучула алагъа къатышып, кеси билимлерин, фахмуларын да кёргюзтюр амалла табадыла. Дагъыда форумлагъа, семинарлагъа, лекциялагъа, мастер-класслагъа къатышадыла.
Бу бирлешиуню хар келечиси кесине жууукъ, билимин ачыкълагъан хайырлы шартла табады.
Башда айтханыбызгъа шагъатлыкъ этген бир юлгюлю окъуучуну юсюнден айтыргъа сюебиз. Ол Кёнделен элни Доттуланы Ахмат атлы 1-чи номерли школдан Доттуланы Омарды. Ол «Биринчилени атламлары» бирлешиуню элде бёлюмюню председателиди, Элбрус районну жаш тёлю ишлери жаны бла советини келечисиди.
Омар, школда биригиу ачыла башлагъан заманда, аны къураугъа, аны бла байламлы кёп ишлеге, семинарлагъа да тири къатышханды. Озгъан жыл ноябрьде КъМКъУ-ну чеклеринде бардырылгъан «Мадар этерге заман» деген Биринчилени регион школу ишин бардыргъанды.
Анда хар келечи кесини ёз проектин жарашдырып, аны къорууларгъа керек эди. Омар бла Биринчилени келечиси, 4-чю номерли школну окъуучусу Аппайланы Амина бу школну ишине къатышхандыла. Окъуу учреждениялада сабийлени намысларын сындырыугъа, зорлукъ этиуге къажау социал видеоролик алдырыргъа таукел болуп, ол проектни къолгъа аладыла.
Роликни сценарийин Кёнделенни 4-чю номерли школуну къошакъ билим бериуден устазы Эфендиланы Зульфия жазгъанды. Ойнагъанла да ол мектепни окъуучулары эдиле, Омар бла Амина уа – баш рольлада. Бу проектни энчи белгилеп, «Эм иги сценарий» бёлюмде саугъа жерге тийишли кёргендиле. Былайда Дотту улуну социал сетьлени чеклеринде тири иш бардырыуу ючюн, аны Биринчилени федерал бёлюмюнде да таныгъандыла.
Ол быйыл Россейни ара шахарында ВДНХ-да бардырылгъан сабийликни эм жаш тёлюню Биринчилени атламларыны фестивалына Россейни 89 регионуну келечилери бла бирге къатышханды.
Аланы хар биринден да кесине керекли, хайырлы оюмла алгъанын да белгилейди жаш. Биринчиден, ол сынамды, экинчиден а, тенглерини араларында байламлыкъны бла шуёхлукъну кючлендириуге юйретген жашау дерсди. Быллай, не жаны бла да ачыкъ, оюмлу, ётгюр жаш тёлюбюз болгъанына ёхтемленебиз.
