9 июля, 2024 - 11:15
ЦIыхум нэхъ лъапIэ дыдэу иIэ узыншагъэр хъумэныр зи пщэрылъ медицинэ лэжьакIуэхэр жэуаплыныгъэшхуэ зыпылъ IэнатIэ пэрытщ. ЩIэныгъэмрэ Iэзагъэмрэ къыдэкIуэу, а IэщIагъэм ирилажьэхэр гумащIэу, гуапэу щытыпхъэщ, сыт щхьэкIэ жыпIэмэ, дохутырым и хущхъуэм япэ абы и псалъэ гуапэрщ сымаджэм щхьэпэ хуэхъур. Аращ дохутырым и псалъэри хущхъуэщ щIыжаIэжыр. А псалъэхэр мызэ-мытIэу зэхихат, абы къыщымынэжуи, езым и IэнатIэми щигъэунэхуну къыхуихуащ Тэрч къалэм дэт поликлиникэм и лэжьакIуэ Ахъсор (Ирыгу) Каринэ Алик и пхъум. Каринэ IэнатIэм зэрыпэрыувэрэ зэманышхуэ дэмыкIами, абы хузэфIэкIащ цIыхухэм я гум дыхьэн. Шэчыншэу, ар абы къыщIехъулIари лэжьыгъэм зэфIэкI хъарзынэхэр къызэрыщигъэлъагъуэрщ, апхуэдэуи гъэсэныгъэ дахэ зэрыхэлъырщ. Бзылъхугъэр тедгъэпсэлъыхьащ и IэщIагъэр къызэрыхихам, ар къызэрыщыхъум.
«Дохутыр IэщIагъэм сызэрысабийрэ сыдихьэхэрт. СыкъыдэкIуэтеиху нэхъ сыхуэпабгъэу, си нэ къыхуикIыу щIэздзащ, - жеIэ Каринэ. – Си адэ-анэми си хъуэпсапIэр къыщыздаIыгъым, сытегушхуэри, Владикавказ дэт къэрал медицинэ академием сыщIэтIысхьащ. СфIэфIу, сигу ирихьу, кIуэ пэтми нэхъ сыдихьэхыу сыхуеджащ IэщIагъэм. Иджыпстуи гухэхъуэгъуэ къызиту сыпэрытщ IэнатIэм. Пэжщ, лэжьыгъэ тыншкъым, ауэ удэзыхьэх Iуэхумэ, абы пыщIа гугъуехь псори къызэрыптехьэлъащэ щыIэкъым. Уеблэмэ езы IэщIагъэм а псом узэрыпэлъэщын, нэхъыбэжми утезыгъэгушхуэн къару къыпхилъхьэу апхуэдэщ. ГурыIуэгъуэщ, узым къигъэдзыха цIыхур тэмакъкIэщI зэрыхъур, махуэм уи деж къекIуалIэ апхуэдиз цIыхуми узэрырагъэзэшыр. ИтIанэми, дохутыр IэщIагъэр къыщыхэпхакIэ, сымаджэхэм я арэзыныгъэр къызэрыпхьыным ухущIэкъуущ уи лэжьыгъэм узэрыбгъэдэтыпхъэр.
Лэжьыгъэр зэрыхьэлъэм, гуащIэшхуэ зэрытебгъэкIуадэм зыдебгъэшэхмэ, шэч хэмылъу, ар къогугъуэкIыу, нэхъ щIэх уригъэзэшу хъунущ. ЗытебгъэщIэн хуейр а IэщIагъэм и щхьэпагъырщ, абы и фIыгъэкIэ уи сэбэп цIыхухэм зэребгъэкIыфырщ. Сыт и уасэ уи фIыгъэкIэ зи узыншагъэр зытеувэжа цIыхум и нэгум къищ гукъыдэжыр плъагъуныр, абы и фIыщIэ псалъэхэр зэхэпхыныр. Апхуэдэ теплъэгъуэхэр ди лэжьыгъэм щымащIэкъым, къапщтэмэ, абыхэм си щхьэр лъагэу сагъэлъагъуж, гушхуэныгъэ къысхалъхьэри, си лэжьыгъэкIэ нэхъыбэж зэрызэзгъэхъулIэным сыхущIокъу. Си дежкIэ гуапэщ цIыхухэм сэбэп яхуэхъу IэнатIэм сызэрыпэрытыр, махуэ къэскIи хьэкъ сщохъу си гъащIэ гъуэгуанэм си IэщIагъэ лъагъуэр пэжу зэрыщыхэсшар. Иджыпсту сызыщIогупсысыжри, нэгъуэщI IэщIагъ сыпэрыту си нэгу къысхущIэгъэхьэххэркъым».
ГурыIуэгъуэщ Каринэ зыпэрыт Iуэхум дихьэхыу, игури и псэри етауэ зэрырихьэкIыр. Апхуэдэхэрщ IэщIагъэм къыхуигъэщIащ зыхужаIэр. Дохутыр ныбжьыщIэм и зэфIэкIым хэхъуэу, и IэщIагъэм и хъер илъагъуу и IэнатIэм илъэс куэдкIэ пэрытыну ди гуапэщ.
