9 июля, 2024 - 15:32
Москваны ВДНХ-сында биринчи халкъла аралы сабий эм жаш телю фестиваль бардырылгъанды. Анга Россейни 89 регионуну келечилери къатышхандыла. Аланы араларында Бызынгыдан 10-чу классны окъуучусу Холаланы Сафият да болгъанды. Ол жолоучулугъуну юсюнденди бардырабыз бюгюннгю ушагъыбызны.
- Сафият, бек алгъа фестивалгъа къалай бла тюшгенинги юсюнден айтсанг эди.
- Мен «Биринчилени атламлары» битеуроссей сабий эмда жаш телю жамауат биригиуню элде Мечиланы Кязимни атын жюрютген мектепде къуралгъан белюмюне биринчилени санында киргенме. Ары дери волонтерлукъ бла да къаты кюрешгенме. Элде къарт, къарыусуз, жангыз адамла бардыла, алагъа барып, керекли жумушларын толтурабыз. Чекчилени да жокълайбыз, байрамлада концертле бла барыучубуз.
Москвада фестиваль боллугъуну юсюнден сабий эмда жаш телю биригиуню Черек районда белюмюню башчысы Мокъаланы Айза билдиргенди. Ол республикадан фестивалгъа жаланда бешеулен баргъанларын, мен да аланы араларында болгъанымы айтханды.
Республикадан баргъан къауумгъа «Биринчилени атламларыны» регион белюмюню таматасыны орунбасары Карина Сижажева башчылыкъ этгенди. Аэропортда бизни къауумгъа дюгерлиле, ингушлула да къошулгъандыла. Алай бла, битеу да 22 адам болуп баргъанбыз.
- Биринчи кюн къалай етгенди?
- Къонакъ юйге келип бир кесек солугъаныбыздан сора, барыбызгъа да энчи келекле келтиргендиле. Дюгерлилени, бизни, ингушлуланы да бир командагъа бирикдиргендиле. Атыбызгъа уа «Команда-33» деп атагъандыла. Бир бирден хазна айырылмай айланнганбыз, керек заманда бир бирге билеклик да этгенбиз. Артда уа шуехла да болгъанбыз.
- Фестивалда уа не сакълай эди сизни?
- Биринчи кюн окъуна кеп сейирлик затла кергенбиз, аланы асламысы шагъырейлениу бла байламлы эдиле. Анда къолдан усталаны мастер-класслары къуралгъан эди. Алада ким да жюреги жаратхан затха юйренирге, кесини хунерлигин кергюзтюрге да онг таба эди. Илмудан, туризмден, къудуретни сакълаудан, энчи иели иш ачыудан, волонтерлукъдан да хапарлы болургъа, кеп затха юйренирге да амал бар эди. Бизни къауум туризмге бла волонтерлукъ ишге аслам эс бургъанбыз. Энчи кесими юсюмден айтсам, туризм бла байламлы мастер-классха къатышханма. Нек дегенде, Бызынгыгъа табийгъатыбызны тамашалыгъын керюрге кепден-кеп адам келеди, алагъа деп къонакъ юйле, ашханала ачыладыла. Туристлени жумушларын тынгылы тамамларгъа да тийишлиди.
- Нени бегирек жаратханса?
- Мен къатышхан мастер-классда юйюр туризм бла байламлы ишни къалай къурагъаны оюн халда кергюзтюлгенди. Ол сейир эди. Туризмге жораланнган спорт эришиуле да болгъандыла. Жашчыкъла бла къызчыкъла эки чархлы машиначыкълада айланч-къыланч жолла бла етерге кюрешгендиле. Дагъыда къыл къобузну согъа билгенле бла олтуруп, аланы сокъгъанларына, жырлагъанларына тынгылап, зауукълукъ тапханбыз. Ингирликде уа ачыкъ кекню тюбюнде киногъа, сахна оюнлагъа да къарагъанбыз.
- Белгили адамла бла тюбеширге уа онг чыкъгъанмыды?
- Экинчи кюн бютюн сейирлик болгъанын айтыргъа тийишлиди. Бизге сейир адамла бла тюбешиуле къуралгъандыла. Алай бла белгили артист Сергей Безруков, Лиза Арзамасова, жолоучу Алексей Чумаков, журналист эмда жолоучу Юлия Мирей, фигуристка Евгения Медведева бла да ушакъ эталгъанбыз.
Дагъыда РФ-ни Президентини болушлукъчу Андрей Фурсенко бла да тюбешгенбиз, соруу да бергенбиз. Анга жууап эте, ол: «Адам не заманда да адамлыгъын тас этмей жашаргъа керекди», - деп аллай насийхат этгенди.
«Биринчилени атламлары» битеуроссей биригиуню Москвада белюмюню таматасы Григорий Гуров а, къатыбызгъа келип, хапар соруп, Къабарты-Малкъарда «Биринчилени атламлары» бек тынгылы ишлегенин билгенин да чертип, байрагъыбызгъа да къол салгъаны бизге бек хычыуун керюннгенди.
- Бу жолоучулугъунг эсингде не бла къалгъанды?
- Москваны кергенме: бек ариуду, хар зат да эсде къалырча эди. Бир-бир кезиулени унутур онг жокъду. Сез ючюн, Россейни Президенти Владимир Путинни онлайн селешиуюне уллу эс буруп, ехтемленип тынгылагъанбыз. Ол бизге саулукъ-эсенлик, жетишимле да тежеп, фестивалда ышаннгылы шуехла табарыбызны сюйгенин да айтханды. «Бу фестиваль кеп миллетлени эмда динлени бирикдиргенди, ол а бусагъатдагъы жашауда бек магъаналыды. Жер башында жашагъан адамла бары да бир бирлери бла жарашып жашаргъа керекдиле», - дегенди.
Дагъыда бир кюн, иссилик отуз градусха жетгенине да къарамай, барыбыз да майданнга жыйылып, узун журунланы бирге къысханбыз. Ол а миллетлени бла динлени араларында келишиулюкню белгисиди.
Уллу концерт программаны юсюнден да айтыргъа боллукъду. Белгили артистлеге бла жыр-тепсеу къауумлагъа къарагъан уллу къууанч эди.
Космонавтиканы, социал сетьлени юслеринден билдириулеге да тынгылагъанбыз. Аланы барысын да энчи дефтериме жазып тургъанма.
