23 июля, 2024 - 09:44
Мектеплени бошагъан жашларыбыз сынаулада болдургъан жетишимле бла кёлленнгенбиз. Арт кезиуде жаш тёлю медицинаны асламыракъ сайлагъанча кёрюне эсе да, башха жолну айыргъанларыбыз да бардыла.
Къурманланы Хаджимурат Нальчикни 17-чи номерли школун бошагъанды. Ол физикадан ЕГЭ-де жюз баллгъа тийишли болуп, устазларын, атасын-анасын, бирсилени да къууандыргъанды. Бу дерсден а аны Галина Борисовна Гашокина окъутханды. Биринчи устазы уа Анжелика Михайловна Губашиевады. Аны къолунда сабийлери билим алгъанла уа биледиле – ол усталыкъ даражасы бийикде болгъан педагогду. Жаш тёлюню да окъуугъа кёллендире биледи.
Хаджимурат бирси сынауларында да юлгюлюдю. Сёз ючюн, орус тилден – 97, математиканы къыйын тюрлюсюнден да 84 балл алгъанды. Ол бир дерсден да репетиторгъа жюрюмегенди. Жаланда мектепде устазларыны окъутханларын эмда юйретгенлерин хайырланнганды. Андан тышында онлайн-школну себеплиги бла кеси аллына тюшюннгенди. Бу шарт а окъуугъа – билимге кёлю бла берилген сабий репетиторсуз да жюз баллны алалгъанын толусунлай ачыкълайды.
Аны спорт жаны бла жетишимлери да айырмалыдыла. Алты жылындан бери да ол карате кёкусинкайдан жараулагъа жюрюйдю, тренери уа Насыплыланы Тахирди. КъМР-ни, СКФО-ну, ЮФО-ну да спортну бу тюрлюсюнден кёп кере чемпионуду. Республикабызны жыйымдыкъ командасыны келечисиди, эм иги техникасы болгъаны ючюн да саугъаланнганды.
Дагъыда аны жетишимлерини тизмесинде Москваны авиация институтуну «Учууну траекториясы» деген халкъла аралы олимпиадада хорламы, В. Вернадский атлы битеуроссей ачыкъ жаш тёлю эришиуде кесини энчи проектин къоруулагъаны да бардыла. Аны эм сюйгенни уа – китап окъууду. Аланы ол электрон тюрлюлерин угъай, къагъытда басмаланнганларын сюеди. Анасы Светлана китапханачы болгъанлыкъгъа, андан да алмайды. Тюкенден сатып алып, алай окъуйду.
«Кесими энчи да, сейир да китапханам болургъа керекди», – деп, энди танг кесек жыйышдыргъан да этгенди. Бегирег а классика чыгъармаланы жаратады. Ала бир заманда да эскирмезликлерине, адамны жашауну кёп болумуна тюшюндюргенлерине ийнанады.
Окъуугъа уа Хаджимурат инженер усталыкъны сайлагъанды. Мураты толса, къыралыбызны ара шахарындагъы окъуу юйледен биринде билим алып, ракетала, самолётла ишлер умутдады.
Фрийланы Ибрагим а Къашхатауну битеулю билим берген мектебинденди. Биринчи классдан да жаланда «бешлеге» окъугъанды. Кесини Бир къырал сынаулада жетишимлери бла ол кёплени къууандыргъанды. Алай бла, физикадан 84 баллгъа тийишли болгъанды. Бу жаны бла устазы Аттасауланы Бузжигит Магомедовичге ыразылыгъын айтады. Ибрагим математиканы къыйын (профиль) тюрлюсюнден бергенди ЕГЭ-ни. Андан а 82 балл алгъанды. Орус тилден эсеби уа 72 балл болгъанды.
Школда окъугъан кезиуюнде физикадан, математикадан, бирси дерследен да дайым олимпиадалагъа къатышханлай тургъанды. Сёз ючюн, Окъуучуланы битеуроссей дерс олимпиадаларында быйыл физикадан призёр болгъанды.
Ол дагъыда черченияны сюеди, бу жаны бла Нальчикге жюрюгенди. Къурулуш жаны бла усталыкъны сайларыкъды, аны себепли ол хунер да керек боллукъду. Баям, бу жаны бла юлгю уа анга атасы Ахматды. Аны спортха сюймеклиги да энчиди. ГТО-ну алтын белгиси бла саугъаланнганды. (Аны ючюн да ЕГЭ-леде алгъан эсеплеге хар окъуу юй да кеси балла къошады). Тутушуудан жараулагъа биринчи классдан бери да жюрюгенди, аны Заныколаны Азрет юйретгенди.
Хоханаланы Алан да Къашхатауданды. Аны да Бир къырал сынаулада жетишимлери кёллендиредиле. Ол физикадан ЕГЭ-де 94 баллгъа тийишли болгъанды. Математиканы къыйын тюрлюсюнден – 84, орус тилден а 72 балл алгъанды.
Жашланы экисин да устазла Къазийланы Фазика Хамзатовна (математика) бла Чеченланы Арина Заитовна (орус тил) окъутхандыла. Ала уа, педагогларыны барысына да ыразылыкъларын билдире, сынаулада жетишимлери устазларыны иш кёллюлюклери, билимлиликлери эмда сынамлары ючюн болгъаннга санагъанларын айтадыла.
Аланны да Окъуучуланы битеуроссей дерс олимпиадаларында физикадан призёр болгъанын белгилерчады. Бу жаны бла билими терен болгъанын а экзаменде жетишими да ачыкълагъанды. Андан сора да, ол малкъар тилден олимпиадада Черек районда алчы болгъанды. Эркин тутушуудан жараулагъа жюрюйдю. Кесине усталыкъны уа энергетика жаны бла сайларгъа сюеди. Мураты толса, къыралыбызны белгили окъуу юйлеринден биринде билим алыр акъылдады.
Жыл сайын да биз сабийлерибиз Бир къырал сынаулада бийик кёрюмдюле болдурсала, бютюнда 100 балл алсала, аллай жаш тёлюбюзню барлыгъына къууанабыз, ёхтемленнген да этебиз. Аланы ёсдюргенлеге, окъутханлагъа да хурмет беребиз.
Трамланы Зухура.
