13 августа, 2024 - 10:28
Къартлыкъланы Солтанны жашы Магомет окъууда энчи жетишимлери ючюн алтын майдалгъа тийишли кёрюлгенди. Ол Нальчикни 14-чю гимназиясын тауусуп, бюгюнлюкде вузгъа кирирге къагъытланы бергенди. «Майдалны къолума алгъанымда, бек къууаннганма. Ол мени, атамы, анамы да онбир жылны ичинде салгъан къыйыныбызны эсебиди. Аланы ышаныулукъларына кертичи болалгъаныма бек ёхтемленеме», – дегенди ол бизни бла ушакъда.
Магомет техника жаны бла билим алыргъа сюеди, документлерин беш вузгъа бергенди: Къабарты-Малкъар къырал университетге, Москвада МИРЭА – Россейли технология университетге, Москвада Связь эм информатика жаны бла техника университетге (МТУСИ), Политехге эм Москвада авиация институтха. «Аладан РТУ МИРЭА эм МТУСИ-ге кирсем сюеме. Алада билим бериу бийик даражадады, – дейди ол.
Жашауун информация технологияла бла байларгъа сюйгенин билдиргенди. Ол а келир заманны усталыгъыды, бюгюнлюкде программирование бла кюрешген билимли устала Россейде аздыла.
Магомет Бир къырал экзаменледе да бийик жетишимле кёргюзтгенин айтырчады. Ол санда физикадан 90 балл алгъанды. «Биринчи классдан башлап, хар дерсге да хазырлансанг, кёлюнгю салып окъусанг, экзаменлени бийик белгилеге бераллыкъса. Хау, къыйынды, аны ючюн къадалып кюреширге керекди. Мен кечирек хазырланып башлагъанма. Алгъадан къолгъа алсам, андан да бийик баллагъа жазаргъа боллукъ эдим», – дейди ол.
Бюгюнлюкде жаш адамла билимге итиннгенлери баямды, ол а бек къууандырады. Билим жашауда кенг жол ачады, деп акъыл этеди бизни ушакъ нёгерибиз. «Дагъыда шёндю ЕГЭ-ни кетерирге керекди деген хапарланы эшитеме. Алай, мен акъыл этгенден, ол терсди, сынау низамлы этеди, аны бла бирге уа даражалы вузлагъа кирирге онг береди», – дегенди ол.
«Университетибизни сайлагъанма»
Мусукланы Мурадинни жашы Муслим Нальчикни 5-чи номерли школун алтын майдалгъа бошагъанды, бир къырал экзаменде битеу сынауланы да 90 баллдан бийикге бергенди, ол санда орус тилни, обществознанияны да.
Бюгюнлюкде уа Муслим Къабарты-Малкъар къырал университетни юридический факультетине уголовный право жаны бла усталыкъ берген бёлюмюне кирирге хазырлана турады. «Башха шахаргъа барыргъа деп акъыл да этгенме, алай бизни университетде да бередиле иги билим. Анам да бу вузну тауусханды, алгъан билимине ыразыды. КъМКъУ-ну диплому бла ишге кирип, жетишимли болгъанланы таныйма», – дейди жаш бизни бла ушакъда.
Муслимни акъылына кёре, ЕГЭ къыйын эсе да, аны жетишимли берирге онг барды. «Окъуугъа ат башындан къарамай, жууаплы болургъа керекди. Ол заманда битеу сынауланы да бийик баллагъа берирге онг барды. Школну алтын майдалгъа бошаялгъаныма бек ёхтемленеме. Алай къууанырыкъ да сунмагъан эдим кесими. Былайда аппам бла аммам Башийланы Хадисге бла Зулягъа эмда анам Зухурагъа ыразылыгъымы айтыргъа сюеме. Ала манга не башламчылыгъымда да болушуп, кёллендирип тургъандыла», – дейди Муслим.
Токъланы Фатима.
Мураты – врач болургъа
Школну бошагъан жаш тёлюбюз быйыл бютюнда бек къууандыргъанды жетишимлери бла. Псычох элни орта школуну айырмалы окъуучусу Жантууланы Рустамны жашы Ислам да аладан бириди. Мектепни бошагъан 5 окъуучудан аны «кюмюш» бла тауусхан таулу жаш болгъанды. Ол жашауун медицина бла байламлы этерге сюеди.
Ислам бизни газетибизге да терк-терк жаза тургъанладанды. Малкъар элде ёсмегенликге, ана тилибизни аныча билгенле миллетибизде бюгюнлюкде бек аздыла. Ёз оюмларын ангылашыныулу къагъытха тюшюрюп, аны газетде басмаларча чекге жетдирип, хазырлай билиу а шёндю, сёзсюз, жетишимди. Ана тилибизде бардырылгъан кёп тюрлю республикалы эришиуледе да ол алчыланы санында болады.
Аны мураты Санкт-Петербургну бийик билим берген медицина вузларындан бирине кирип, педиатр болургъады. Заман бара-баргъанда, биз бу жашны жангы жетишимлерини юслеринден билдирирбиз, деп ышанабыз.
