25 августа, 2024 - 10:29
Магрелланы Марат гитчелигинден окъуна аскерчи болургъа сюйгенди. Школну бошагъанлай, ата-анасы унамагъанларына да къарамай, къагъытларын Пермьде Россей Федерацияны миллет гвардиясыны аскерлерини институтуна береди. Тынч, сабыр жашны аскерчи усталыкъны сайлагъаны ол заманда кёплеге сейир кёрюннген эди.
Школну бек иги белгилеге бошагъан, спортну тутушуу тюрлюсю бла кюрешген, кёп тюрлю район, республикалы эришиулеге къатышып, алчы жерлеге тийишли бола келген къарыулу жашны аскер институтха сюйюп алгъандыла. Анда да жаш атын иги бла айтдыргъанлай турады. Бусагъатда кичи сержант чында взводну командирини орунбасарыды. Кёп болмай а атасы Арсеннге окъуу юйню 5-чи номерли полкуну командири полковник Е.Н. Кашков къол салып, ыспас письмо келгенди.
«Хурметли Арсен Кубадиевич! Россей Федерацияны Ф.Э. Дзержинский атлы миллет гвардиясыны Суворов, Жуков, Ленин эмда Октябрь Революция атлы орденлерине тийишли болгъан Къызыл Байракълы энчи дивизияны институтуну башчылары сизни жашыгъыз кичи сержант Магрелланы Марат аскер къуллугъун бир адам да чурум тапмазча бардыргъаныны, аскер техника эмда сауутла бла уста хайырлана билгенини, не заманда да низамлы болгъаныны, анга салыннган борчну тынгылы толтургъунчу тынчаймагъаныны юсюнден уллу ёхтемлик бла айтабыз.
Андан сора да, Марат иги окъугъаны, буюрулгъан жумушну терк да, тынгылы да тындыргъаны бла тенглерине юлгюдю, кёп махтаулагъа, саугъалагъа да тийишли болуп келеди.
Быллай аламат жашны, Ата журтну тынгылы къоруулаучусун ёсдюргенигиз ючюн, уллу ыспас этеме, бек сау болугъуз. Сизге, жууукъларыгъызгъа, ахлуларыгъызгъа да саулукъ-эсенлик, мамырлыкъ, монглукъ тежейме. Тутхан ишигизден къууаныгъыз», – деп жазылгъанды анда.
Марат туугъан эли Къашхатаугъа келеди. Ол кюнледе да жарауларын къоймайды, сёзсюз, бир класслылары, жууукълары, шуёхлары бла да тюбешеди, алада болгъан жангылыкъланы сорады, кесини, окъуууну юсюнден да хапар айтады. Аны школда окъугъан къарындашы да барды. Ол а тепсерге бек устады, школдан сора Искусстволаны Шимал-Кавказ институтуна кирир умутулуду. Марат, узакъда болса да, къарындашчыгъыны окъуууна, адеп-къылыгъына да сакъды, дайым да соруп, билип турады. Тамата эгечи да юлгю болурчады: Москвада ординатурада окъуйду. Маратны анасы, жарсыугъа, юч жыл мындан алгъа ауушханды. Алай, атасы хар не жаны бла да анга таянчакълыкъ этеди.
