25 августа, 2024 - 09:41
Энчи аскер операция баргъан жерледе къазауат этген жашларыбызны араларында Бедикден Сотталаны Эльдар да барды.
Медицина службаны майору энчи аскер операциягъа ол башланнган биринчи кюнден бери къатышады. Аллай бир заманны ичинде кёп жаралыланы кёргенди, иги кесегине болушханды. Аны себепли таукел айтыргъа боллукъду: медикле да хорламны жууукълашдырыугъа юлюшлерин къошадыла деп. Ала харкюнлюк ишлери бла жигитлик этедиле.
Эльдар да аллай жашладан бириди. Ол уруш баргъан жерде, окъланы, топланы тюбюнде жаралылагъа биринчи болушлукъну этгенди, аланы къоркъуусуз жерге элтип, ызы бла госпиталгъа келтиргенди. Аны огъурлу къоллары кёп жашланы аягъы юсюне этип, бирлени артха, частьха, башхаланы уа юйюрлерине, аналарына, сабийлерине къайтырча этгенди.
Бир къазауатда уа кеси да ауур жаралы болгъанды. Аягъы юсюне тургъандан сора, аны юйюне ашыргъандыла. Алай ол, реабилитацияны ётюп, къазауат баргъан жерге кетгенди.
Артха къайтхандан сора, жашны командование башха къуллукъгъа салгъанды. Энди Эльдар Хауа-десант аскерлени бёлюмюнде къуллукъ этеди, жаралы болгъан жашланы самолёт неда вертолёт бла алагъа тынгылы багъарча жерлеге жибереди.
Сотталаны Эльдар Кишиликни ордени, кёп майдалла бла да саугъаланнганды. Алай жаш кесин жигитлик этген сунмайды, Ата журтха къуллукъ этиуню сыйлы борчуна санайды. «Мен болмасам, башхасы табылыр эди олсагъатда», - дейди.
Эльдар школну бошагъандан сора, юйде аны юрист болурун сюйгендиле. Алай ол а аскер врачлыкъны сайлап, Санкт-Петербургда С.М. Киров атлы аскер-медицина академиягъа кирип, аны айырмалы бошап чыкъгъанды. Жаш окъууун бошай туруп, Гиппократны антына кертичи болурун айтхан эди да, сёзюн бузмай келеди.
Эллиле жашны адеплилиги, иш кёллюлюгю ючюн да сюйгенлерин айтадыла. «Жууукъ-ахлугъа къайгъыра билген жашды. Аскерде да аланы унутмайды, кёллендирир сёзле табады, элден хапар соргъанлай турады», - дейдиле.
- Мени атам бла анам ёсдюргендиле аны, - дейди анасыны эгечи Бачиланы Жаннет. – Къартланы къатында ёсген жаш а аман болур амалы жокъду. Ол школда бек иги белгилеге окъугъанды. Аны командири: «Сени юйюнге барып, ёсдюрген аппангы кёрюрге сюе эдим», - деучю эди. Биз Эльдар бла ёхтемленебиз!
