10 сентября, 2024 - 09:41
Мазэхэ жэщщ. Жэщ хьэщIэ жагъуэр и бийм поплъэри къуэгъэнапIэм къуэсщ. «Уэ къуажэм укъыдыхьэжынущ. Си псэм жеIэ… Нэху щыху си нэбдзыпэ зэтезмылъхьэу сыппэплъэнщ… Сэ сыпIащIэркъым… Сыщыгъуазэщ уи лIыгъэр здынэсым. Зэхэсхыжащ уи лъапсэр убгынэну узэрыхуэмеяри. Ауэ уи анэжьым и щхьэфIэпхыкIыр зэтрилъэфу уи пащхьэ лъэгуажьэмыщхьэу зыщригъауэм, уемыдэIуэн плъэкIакъым. IэфIщ-тIэ анэр. Си анэр зыхьа узыфэр къызыхихар уэ букIауэ щIилъхьэжа и къуэрщ. Зэрыпхуэзгъэгъун мы дунейм теткъым. Си псэм жеIэ, ныщхьэбэ дызэхуэзэну. Мис итIанэ плъэкIмэ, зыхъумэж. ПщIэуэ пIэрэ къуэ къызэрыпхуалъхуар? Сэ, плъагъуркъэ, фыз къэсшакъым, си щхьэм илъыр сщIэртэкъыми. Уи хьэгъуэлIыгъуэри си нэм бжэгъуу къыщIэуащ. УзукIыфыну щытат абы щыгъуэ, ауэ си анэм и гугъу умыщI, къыщызжиIэм, къэзгъэгугъат… Иджы зыри си пэрыуэгъукъым. Сэ шыIэныгъэр схурикъуащ - мазибгъукIэ сыппэплъащ. Тхьэмахуэ ипэкIэ къуэ къыпхуалъхуати, дауэдапщэхэр зэфIэкIащ. Иджы укъекIуэлIэжынщ, дэнэ укIуэн… Сыщхьэукъуауэ ара?! Жэщищ мэхъури си напIэ зэтеслъхьакъым».
Пабжьэ гуэрэным хэса щIалэр къызэфIоувэри, и лъакъуэ ундэрэбжьам зрегъэгъэпсэху. Лъэмакъыншэу щхьэгъубжэм бгъэдохьэ. Илъагъур и фIэщ мыхъуу къоуIэбжь: бийр жьэгум пэрысщ, и къуэр и IэплIэм илъу.
Жэщ хьэщIэм сэ хэпIуамэ, лъы IэмпIэ къыщIэкIынтэкъым. Лъыр и щхьэм дэуеящ. Ефыгъуащ. Зы мэскъалщ иIэжар иIыгъри зыIыгъри иукIыным… ТэлайкIэ жэщ хьэщIэр щытащ, и бзэр дияуэ. И щхьэр и IитIымкIэ фIиубыдыкIыжри гурымащ. Ехъуэпсащ…
Сабий цIынэр зыIыгъ щIалэр къызэплъэкIащ. Абы псэкIэ зыхищIащ щIыбым къызэрыщыпэплъэр. И IэплIэм илъ сабий жейр и анэм IэщIилъхьэжащ. Iэщэфащэ зыкIэрихар къимыщтэжу бгырыпх пцIанэу бжэщхьэIум ебакъуэщ, хуэсакъыу бжэр къыхуищIыжри:
- Къеблагъэ, хьэщIэм сыту хуабжьу зыбгъэгува? - жиIащ абы мамыру.
Къамэ къудеи кIэрымылъу и пащхьэ къиува хэгъэрейм и лIыгъэм жэщ хьэщIэр ехъуэпсащ.
Жэуап пидзыжын имыгъуэтауэ щэхуу къыдыхьа жэщ хьэщIэр нахуэу куэбжэмкIэ дэкIыжри ежьэжащ.
