29 октября, 2024 - 11:55

Алгъаракълада Стамбул шахарда «Тюрк дуниясы» атлы халкъла аралы сабий фестиваль жыйырма тёртюнчю кере озгъанды. Ол кеси да Тюрк дунияны тинтген фондну башламчылыгъы бла къуралып, энди жыл сайын бардырылады. Фестивальны мураты тюрк тамырлы республикаладан эмда жер-жерледен сабийлени бир бирлерини маданиятлары бла шагъырейлендириудю. Андан сора да, жаш тёлюню – «тюрк къарындашлыкъ», аланы, юйюрлерини да алларында шуёхлукъ сезимлени къозгъауду эмда кючлеудю.
Анга бу жол Азербайджандан, Къыргъызстандан, Татарстандан, Къазахстандан, кёп башха жерледен да келечиле, жыр, тепсеу къауумла да къатышхандыла. Бизни республикадан а ары Алима Афаунова баргъанды. Къызчыкъны анасы уа таулуду – Гайыладанды. Саулай да Шимал Кавказдан фестивальгъа Алима жаланда кеси къатышханын, ол анда тауча жырлагъанын да белгилерчады.
Ол бешжыллыгъындан бери жырлайды. Анасы Джамиля аны хунерин эслеп, жыл санына да къарамай, Нальчикде Ирина Лиеваны «Рирада» жыр студиясына элтгенди. Ары жюрюп тебирегенли да эришиулеге, фестивальлагъа къатыша, эллиден аслам дипломгъа тийишли болгъанды.
Сёз ючюн, былтыр Москвада «Сени ауазынг» атлы жыр эришиуде экинчи жерни алгъанды. Ары дери уа 2021 жылда Санкт-Петербургда «Хунерлилени тейри къылычы» деген халкъла аралы конкурсда Гран-приге тийишли болгъанды.
- Алиманы жырларгъа берирге, аны хар тюрлю эришиуге жюрютюп турургъа да тынч эди деп да айталлыкъ тюйюлме. Юйюрде, сиз да сыйлы болугъуз, сабийле алтауландыла. Ол а тёртюнчюдю, ызындан да андан кичи – экиси. Аталары эртте ауушуп, айып этмегиз, къыйналыргъа тюшген эсе да, бюгюнлюкде жетишимлери бла ыразыма. Бирсиле да бирери бирер зат бла кюрешедиле, окъугъан да иги этип, манга да болушадыла, - дегенди анасы Джамиля.
Стамбулда бардырылгъан фестивальны боллугъун а юйюр интернетде кёрюп, анга къатышыргъа алай кёлленнгенди. Къызчыкъны ары чакъыргъанларындан сора уа, энчи анга деп малкъар тилде «Сакъла аны» деген жырны хазырлагъандыла. Аны сёзлерин – Гюлюйланы Мадина, макъамын а Аслан Лиев жазгъандыла.
Джамиля Стамбулгъа аны биргесине баргъанды. Алай эсе да, фестивальны къуралыу низамына тийишлиликде сабийле тюрклюлени юйюрлеринде тургъандыла. Алима да устазланы юйюрлеринде жашагъанды. Ол жырларыкъ кюнде уа, анга къууанып, ала да майданнга келип, анга къайгъыргъанлай тургъандыла. Къызчыкъ тауча жырлап тебирегенде уа, алайда жыйылгъан жамауат бютюнда къаты къарс уруп, анга ыразылыкъларын да билдиргендиле. Алимагъа анда алтын майдал берилгенди. Стамбулну мэри да энчи саугъалары бла къууандыргъанды.
Алиманы бу фестивальгъа къатышыргъа энди да чакъыргъандыла. Келир жылны июнь айында да ол ары барыргъа кёлленипди, жангы жыр да хазырларыкъды.
Стамбулдан къайтханлы бери уа малкъар тилге бютюнда эс бургъанды. Алайсыз да Джамиля сабийлерин барысын да мектепде тауча окъурча бергенди. Андан тышында да, къызчыкъ тюрк, ингилиз тиллеге юйрене турады. Энди да ары барса, Ахмедни юйюрюнде (алгъын жашагъан жеринде) турургъа, ала бла уа къыйналмай сёлеширге сюеди. Бюгюнлюкде уа шуёхлукъ жюрютгенлей, байламлыкъны юзмейди. Аланы кеслери, сабийлери бла да телефон бла сёлешеди.
Алима Москвада биз огъарыда сагъыннган эришиуге къатышхан кезиуюнде Гнесинле атлы музыкалы россей академияны келечилери аны анда окъургъа чакъыргъандыла. Алай бла ол энди аллай мурат бла жашайды, анда билим алыр умутдады.
Жыр жаны бла эришиулеге кёп къатыша эсе да, окъугъан да иги этеди. Нальчикни отуз ючюнчю мектебине жюрюйдю. Анасы уа ол Окъуучуланы битеуроссей дерс олимпиадаларында биологиядан призёр болгъанына къууаннганы бла бирге сейир да этеди. Алима, бирси сабийле да муратларына жетер ючюн, къолундан келгенни аямай, аланы кёллендиргенлей, хунерлерине, билимлерине да ышаннганла болурча къайгъыргъанлай турады.