5 ноября, 2024 - 13:59
Бу суратда сиз кёрген батыр аскерчи Мечукъаланы Висханды. Жашны атасы Исхакъгъа бла анасы Мадинагъа ол къуллукъ этген аскерчи бёлюмден ыразылыкъ письмо келгенди. Анда командирле таулу жашны низамлыгъы, билимге, къуллукъ этиуге итиниулюгю ючюн ыразылыкъларын жазгъандыла: «Аскерде къуллукъ этген заманда Висхан низамлы, иш кёллю аскерчи болгъанын кёргюзтгенди. Командирлени буйрукъларын ол терк эм бет жарыкълы толтурады. Аны бла бирге хайырлы башламчылыкъла эте биледи. Аскерчи нёгерлерини арасында ол хурмет тапханды», - деп жазылады къагъытда.
Висханны жетишимлери, ариу хали, иш кёллюлюгю ючюн командирле кёп кере ыразылыкъларын билдиргенлери да айтылады письмода. «Мындан ары да жашыгъыз Ата журтубузну керти къоруулаучусу боллугъуна, конституциялы борчларын бийик даражада толтурлугъуна ишексизбиз», – деп къошханды аскер бёлюмню командири подполковник А. Поплавский.
Таулу жашны быллай жетишимине къууана, редакцияны атындан анга мындан ары да хорламла тежейбиз.
