5 ноября, 2024 - 11:55
Лашкутачыла Къартлыкъланы Сагъыт бла Земфира тёрт къыз ёсдюредиле. Аладан эм абаданы Алина Ставрополь шахарда Шимал-Кавказ федерал университетини тыш къыраллы тиллерини бёлюмюнде окъуйду. Экинчилери Аида 11-чи классны бошап, окъуугъа киргенди, ючюнчюлери Лейля 8-чи классха ётгенди эм гитчелери Фатима уа алыкъа сабий садха жюрюйдю.
Бюгюн Алинаны юсюнден айтыргъа сюебиз. Ол, башда сагъыннганыбызча, тыш къыралланы тиллерине юйренеди. Окъууну бошаса уа, ингилиз эм испан тилледен тилманч боллукъду. Къыз окъугъан университет дагъыда ючюнчю тилни сайларгъа онг береди. Сайлау арап эм къытай тиллени араларындады.
Бу къыйын усталыкъны сайлауу уа бошдан болмагъанды. Алинаны тиллеге сейири башланнган класслада окъугъан заманындан окъуна билине эди. Испан тилни уа ариулугъун жаратады. Тилден сора да, испан маданиятны, къылыкъ эм миллет энчиликни сейир кёреди ол. Алай кесине эм къаршы, эм багъалы тилге уа къыз ёз ана тилин санайды. Анда чыгъармала окъургъа сюйгенин да билдиреди. Антуан де Сент-Экзюперини «Гитче патчах» деген чыгъармасыны малкъар тилге кёчюрмесин жай солууда окъургъа сюйгенин да билдиргенди бизге.
Студентликни бек жаратып, алгъын ол билмеген, танымагъан кёп аламат онгла университетде ачылгъанларын айтады. Миллетлери башха болгъан, алай кесине оюм, акъыл жаны бла къаршы тенглерини араларында шуёхлукъ жаратылгъанын а энчи белгилейди. Аны себепли окъууда ётген хар кюню да анга бек магъаналы эм багъалыдыла. Ала бла бирге университетни жашаууна да тири къатышыргъа сюеди. Вузда жандауурлукъ ишге эм волонтёрлукъ къауумунда кёп сейир ишле жалчытханларын ёхтемленип айтады.
Алина, быллай керекли эм къыйын усталыкъгъа окъуй тургъаныны тышында да, бизни сейирибизни кесини чыгъармачылыкъ фахмусу бла къозгъагъанды, ол болмагъанча ариу суратла ишлейди. Анга ол бир саугъача берилген аллай фахмуду. Къыз сурат ишлеуню амалларына кеси аллына юйренеди. Холстда гуашь бояула бла ишлеген суратлары фотоаппарат бла алыннганлагъа ушайдыла. Андан сора да, графиканы хайырланады, компьютерде да хазырлагъанлары да кёргенни эсинде къаладыла. Ол аланы акъылына келтирип, эсине тюшюрюп, кеси аллына къурайды.
Окъугъан чыгъармалары да, аны кёллендирип, илхам бередиле. Сыфатла уа жюрегинде жаратыладыла. Алина ишлеген суратлары бла кёп тюрлю эришиулеге къатыша да турады. Алай бегирек эсинде къалгъаны уа 2021 жылда «Нарт Дебетни туудукълары» деген эришиуге къатышханы болгъанды. Ол кюн анда назмула окъулгъандыла, нарт жырла айтылгъандыла, сахна оюн да салыннган эди. Нарт эпос чексиз бир уллу хазна болгъанын айтады ушагъыбызны чегинде ол.
Ийнанабыз Алинаны не жаны бла да фахмулу болгъаныны хайырындан, окъууунда, чыгъармачылыкъда да аламат атламлары алда болгъанларына.
