19 ноября, 2024 - 08:03
Бюгюннгю ушакъ нёгерибиз КъМКъУ-ну медицина академиясыны «Багъыу иш» специалитетин жетишимли бошагъан Мокъаланы Керимни къызы Марианнады. Ол Къашхатауда жашайды. Атасы Керим жыйырма жылдан артыкъны Ростелекомну Къабарты-Малкъарда филиалыны Черек районда бёлюмюне таматалыкъ этгенди. Анасы Фатимат Районну жамауатыны социал жумушларын юйлеринде жалчытыу жаны бла бёлюмюню таматасыды. Гитче къарындашы Расул 8-чи классха барады.
- Марианна, сен медицинаны сайлагъанынгы не бла байлайса?
- Медицина жаны арталлыда эсимде тюйюл эди. Анда-санда анам сагъына туруучу эди, врач болурму эдинг деп. Къалай-алай болса да, къадарым кеси келтиргенди бу усталыкъгъа дерге боллукъду. Абадан класслада химияны бла биологияны бегирек жаратханымы сезип, ала бла байламлы усталыкъ медицина болгъаны ючюн, сайлауум мында тохтагъанды. Аны тюз сайлау болгъанын бла къалгъанын а заман бла жашау кёргюзтюрле.
- Алтын майдалынг бола тургъанлай окъуугъа кириуде къаллай чырмаулагъа тюбегенсе?
- Чырмаула школну бошай тургъан жылымда башланнган эдиле. Школ дерслени барына да келмей, аланы орунларына репетиторлагъа жюрюуню сайласам, ол майдалдан къуру къалыу эди. Алай школ устазларыма бюгюн да жюрек ыразылыгъымы билдиреме. Ала жюрюмеген дерслерими жангыдан окъургъа онг берген эдиле. Заманны жетишдиралмай бир кесек къыйналгъанма. Сора окъуугъа кириуге болушлукъ этген репетиторларым Лариса Петровнагъа, Марина Мухамедовнагъа бла Асият Хаутиевнагъа ыспас этеме. Ала берген билим энчи эди.
Дагъыда кюн сайын окъуугъа ётгенлени тизмелерин тинтиу бек къайгъылы болгъаны эсимдеди. Жарсып, къоркъуп да къараучу эдим. Кеси кючюме бла билимиме не бек ышансам да, кёпчюлюкде хар тюрлю зат болады. Къагъытларым Ростов шахарда бла Санкт-Петербургда ётген эдиле. Атам бла анам узакълагъа кетип окъурума ыразы болмагъанларын билдиргенлеринде, республикабызда къалыргъа таукелленнген эдим. Бюгюнлюкде алагъа бек ыразыма аны ючюн.
- Студент жылларынгда жамауат бла байламлыгъынг къалай къуралгъанды?
- Студент жылларым жашауда кёп затха кёзюмю ачхандыла. Адамла хар тюрлю болгъанларын, кёплени айтханлары бла этгенлери келишмегенин да ангылагъанма. Къалай болса да, ол да мени жашауумда бир уллу сынамды. Аны ангылар ючюн а, жаш заман, студент жылла бек игидиле. Абадан бола баргъаным сайын, жашаугъа энчи кёз къарамым къуралады.
Саусузла бла араны сууукъ тутаргъа угъай, керекли заманда терк оноу чыгъара билир ючюн, апчымай къымылдай билир ючюн медицинада ишлеген адам бир кесек къатыракъ болургъа керекди. Саусузну сезимлерин, жарсыуларын да бирге кёрюрге тийишлиди.
Адамланы халларында игиликни кёре билгеними энчи чертеме. Жамауатха къарамым жыл саным бла бирге ёсе келеди. Мен биринчи практикамы реанимацияда ётгенме. Анда хар тюрлю болумгъа жолугъа, алгъан билимими хайырланыу не къадар магъаналы болгъанын да ангылагъанма.
- Санга юлгю болгъан тенгинг неда устазынг бармыды?
- Тенглерим кёпдюле. Сабийликден да биргеме болуп, эгечлик эм тенглик этген Гергъокъланы Фариданы белгилеяллыкъма. Медицина жаны бла кесиме ийнаныууму кючлеген а анамы къарындашы Мутчаланы Казбекди. Мен аны уллу сынамы болгъан, акъыллы эм фахмулу врачха санайма. Алыкъа андан кёп юйренир затларым бардыла.
- Жашауунгда чыгъармачылыкъ бармыды? Бош заманынгда сейиринги къозгъагъан неди?
- Болмай а! Тиге, эшиу эше, накъышла сала, пианинода согъа, бир ненча тюрлю тепсеуледе да кесими сынагъанма. Дагъыда сурат, видео алдырыргъа, аланы монтажын этерге да сюеме. Суратлау адабиятха сюймеклигим а энчи бир дунияды. Медицина бла байламлы китапланы да кёп окъуйма.
- Кесинги насыплы адамгъа санаймыса? Тюздю, алыкъа энди жашау этип башлагъанса, алай иги бла аманны айыра билесе.
- Бу соруу къыйынды. Мен иги жашау бардырама десем, тюз болур. Сюйген юйюрюм, къаршы адамларым, тенглерим тёгерегимдедиле. Ашым кем болмаса, юсюм жаланнгач болмаса, тамаша табийгъаты бла республикада жашасам, насып деген ол болур. Жашауда алыкъа толтурлукъ жумушларым, атламларым да, ариу болсала, насыплыма дерге боллукъма.
