5 января, 2025 - 11:15
Гуталаны Хасан, бюгюнлюкде Ата журтубузну сейирлерин къоруулай, энчи аскер операциягъа къатышады. Ары дери уа ол Нагорный Карабахда Россейни мамырлыкъны тохташдырыу жаны бла аскер бёлюмюнде къуллукъ этгенди эмда сыйлы къырал саугъагъа да тийишли болгъанды. Ол заманда аны тенглеринден бири Максим Нечаев «Мы Россия!» деген газетде былай жазгъанды: «Бизни багъалы къарындашыбыз Гуталаны Мухарбийни жашы Хасанны Россейни командованиясы «Нагорный Карабахда мамырлыкъны тохташдырыу жаны бла ишге юлюш къошханы ючюн» майдалгъа тийишли кёргенди. Ол аны биринчи сыйлы саугъасы тюйюлдю.
Жаш адам СВО-гъа да къатышып, «Аксай районну сыйлы инсаны» деген атха да тийишли болуп, къазауат баргъан жерде мамырлыкъны тохташдырыуну борчун да толтуруугъа къалай жетишалгъанды, деп аллай соруу келеди акъылынга. Баям, ол пелиуан болур! Алай Хасанны юсюнден айтханда, ол аллай болмай амалы жокъду. Анга уа аны бийик аскер усталыгъы, сайлагъан ишине кертичилиги, дайым да аны жетишимли бардырыргъа итиннгени, тенглерини араларында намысы-сыйы да бийикде болгъаны шагъатлыкъ этедиле. Аны ол ашынларын аскер башчыла кёрмей, белгилемей къоймагъандыла.
Къаллай соруугъа да жууап таба билиу, кесин адетли жюрютюу, Ата журтну сюйюу, анга кертичи болуу – ала россейли аскерчини ышанларыдыла. Сен аллай жашладанса. Сеничала Къабарты-Малкъарны атын иги бла айтдырадыла, ёсюп келген тёлюге юлгюдюле. Атанга бла ананга уллу ыспас этебиз, санга уа мындан ары тамамлагъан къуллугъунгда жетишимле тежейбиз».
Хасан Акъ-Сууда 15-чи номерли орта школда окъугъанды. Аны устазы Биттирланы Рахима айтханнга кёре, ол иги окъугъанды, школну жамауат ишине тири къатышханды. Ансыз анда бир байрам, бир жыйылыу да бардырылмагъанды. Спорт эришиуледен да хар заманда саугъала келтирип тургъанды. ГТО-ну мардасын толтуруп, алтын белги алгъанды. Аны тирилиги, спорт бла сабийликден кюрешгени бюгюнлюкде да жарап турадыла.
«Биргесине окъугъанла да аны бек сюйгендиле, жарыкъ кёллю, чамчы болгъаны ючюн тенглери тёгерегин алып тургъандыла. Жолоучулукъгъа чыкъсагъ а, мени болушлукъчум эди. Аны къурау, асламланы ызындан тизе билген фахмусу барды. Хасанны сураты мени столумда мияла тюбюнде турады не заманда да.
Асият бла Мухарбий сабийлерин бек ариу ёсдюргендиле. Бусагъатда аланы кичи къызлары окъуй турады мени къолумда, ол да аллай адепли сабийди», - дейди Биттирланы Рахима.
Жашны школда окъугъанында, артда аскерде къуллукъ этгенинде алгъан саугъаларына, дагъыда энчи аскер операцияда этген жигитлиги ючюн Жуковну майдалы да къошулгъанды.
Холаланы Марзият.
