25 марта, 2025 - 09:27
Юйюрюн, тукъумун, элин, туугъан жерин къоруулагъан хар эр кишини да сыйлы борчуду. Аны таулу миллетни жигит уланлары да бюгюнлюкде бет жарыкълы толтурадыла: Россейни кёп миллетлерини келечилери бла бирге, Ата журтубузну жалынчакъсызлыгъын къоруулай, батырлыкъны юлгюсюн кёргюзтедиле.
Бюгюн сизни ма аллай жигит уланла бла танышдырыргъа сюебиз: Яникойдан Геляхланы Адрахманны жашы Алим эмда аны эгечинден туугъан Энейланы Муратны жашы Руслан бла.
Буйрукъну толтуруу
Геляхланы Алим энчи аскер операциягъа мобилизация бла чакъырылгъанды. Озгъан жыл августда ол туугъан журтубузну къоруулай жан бергенди, Жаннет ахлусу болсун.
- Алимни аскерден бугъунур, къачар умуту болмагъанды. Повестка келгенлей: «Ата журтуму къорууларгъа борчлума, анда ненча нёгерим барды, аладан бир жанында турлукъ тюйюлме», - деп, хазыр болгъан эди, - дейди Алимни къарындашы Залим.
Жигит жаш пулемётчик болуп къуллукъ этгенди. Кёп кере къоркъуулу болумлагъа тюшгенди, алай артха турмагъанды, берилген буйрукъну ахырына дери толтургъанды. «Бир жол кёп заманны Алимни юсюнден жукъ да билмей, бек жарсыргъа тюшгенди. Артда сёлешгенинде, тогъуз кюнню жангыз кесинлей агъачда тургъанын айтхан эди. Ол алайда аскер нёгерлерин тас этгенди, алай салыннган борчланы ахырына дери толтургъанды. Ол кезиуде болдургъан батырлыгъы ючюн Алим Георгийни Жору бла саугъаланнганды», - дейди жигитни къарындашы.
Бу болумдан сора жашха туугъан журтуна солургъа барыргъа да онг берилгенди. Алай мында да ол тынгысыз болгъанлай тургъанды, артха, нёгерлерине къайтыргъа, душман бла сермеширге ашыкъгъанды. Былтыр августда уа къаты къазауатны кезиуюнде жан бергенди. Андан сора «Кишилиги ючюн» майдал бла саугъаланнганды (ёлгенден сора).
- Алим атабыз бла бирге къурулуш бла кюрешгенди. Жерни башында бир халал, чомарт адам бар эсе, ол экинчи эди. Башха адам ачымасын ансы, жанын чыгъарып берлик эди. Алимни эгиз къарындашы да барды – Халим. Ала бир бирлерине асыры ушагъандан, айыргъан къыйынды. Алим ачыкъ жюрекли, лакъырданы сюйген адам эди, къоркъмагъыз, хар не да тап боллукъду деп, барыбызгъа да кёл этдиргенди. Тамата эгечибизни жашы Руслан да СВО-дады. Алим аны бла алай ёхтемленнгенди – къуру сёлешгенлей, сурагъанлай тургъанды, кёл этдиргенди, - деп эсгереди къарындашын ушакъ нёгерибиз.
Антха кертичилик
Энейланы Муратны жашы Руслан да энчи аскер операциягъа биринчи кюнледен къатышады. Ол аскерге чакъырылып, артиллериягъа тюшгенди. Алай энчи аскер операция башланнганлай, кеси ыразылыгъы бла ары кетгенди. «Руслан Изюмню башындан аягъына дери ётгенди», - дейди андан ары ушагъыбызда эгечинден туугъанны юсюнден Залим.
Руслан да, Алимча, Георгийни Жору бла белгиленнгенди. Ол аны бла саугъаланнганда, анга жаланда 19 жыл толгъан эди. Командование билдиргенича, жаш мамыр адамланы, аланы арасында уа сабийчиклени да, къутхаргъаны ючюн тийишли кёрюлгенди ол сыйлы саугъагъа. «Ол жанын сакълагъан къызчыкъладан бири уа письмо жазгъанды, Руслан аны биргесине жюрютеди. Аны къой, Къабарты-Малкъарны байрагъын, ол атышыуда чач-тюк болгъанына да къарамай, атып къоймагъанды, биргесине юйге келтиргенди», - дейди Залим.
Андан сора да, жигитибиз «Кишилиги ючюн» майдалгъа тийишли болгъанды.
Урушну сынамагъан адам аны ачылыгъын, кюйсюзлюгюн бир заманда да ангыларыкъ тюйюлдю. Бютюнда антлы нёгеринг кёз аллынгда жигитча жан бергенин. Алай, жарсыугъа, Русланнга аллайны сынаргъа да тюшгенди. Бир жол аскерчиле къуршоугъа тюшгендиле. Керти нёгери, дагъыстанлы жаш, Русланны жабып, кеси жан бергенди, алайда Руслан да ауур жаралы болгъанды. Кесине бакъдырып, аягъы юсюне болгъанлай, артха, СВО-гъа, къайтханды.
Шёндю Руслан медицина бёлюмге кёчгенди, жаралы аскерчилерибизге болушады, аланы къоркъуусуз жерге къутхарады, жан бергенлени уа атышыу баргъан жерден чыгъарады.
- «Жарсыма, тюзлюк бизни жаныбыздады», - деп, анасыны жюрегин жапсарыргъа кюрешеди Руслан. Кечирек болгъанбыз, алгъадан башларгъа керек эди операцияны, деучюдю. Аскерге кетгенинде, бизге сабий кёрюннгенди, алай юч жылны ичинде ол эр киши болгъанды. Шёндю юридический билим алады заочно, алай СВО бошалгъандан сора жашауун аскер бла байларгъа сюеди, - дейди Залим.
Бюгюнлюкде уа жашха болушхан, кёл этдирген да юй бийчеси Дианады. Ол къоркъмай, кёп сагъыш эте турмай, тойдан сора экинчи кюн биргесине атланнган эди. Руслан энчи аскер операцияны борчларын толтургъан кезиуде, жаш тиширыу къыралны чегини тийресинде туруп, баш иесине, башха аскерчилеге керекли затла ашырады.
Юлгю
Къыралыбызны батыр уланлары энчи аскер операцияда бизни келир жашауубуз, сабийлени насыплары, тюзлюк ючюн къазауат этедиле. Аны ангыламагъан, энтта ишекли болгъан адам хазна къалгъан болмаз.
- Школлада жигитлерибиз бла тюбешиуле артыкъда магъаналыдыла – жашчыкъла бла къызчыкъла аскерчиле аланы ырахат жашаулары ючюн къазауат бардыргъанларын ангыларгъа керекдиле. Руслан солуугъа келген кезиуледен биринде окъугъан школгъа къайтханды. Сабийле аны тёгерегин алып, суратха тюшгендиле. Аладан бири уа юйюне, мен бюгюн жигитни къолун тутханма, аны бла суратха тюшгенме, деп махтанып баргъанды. Бу затла уа жаш тёлюбюз тюзлюкню ангылагъанына, къыралыбызны келир заманы ышаннгылы къоллада болгъанына ийнандырады, - дейди Залим ушагъыбызны ахырында.
Тикаланы Фатима.
