8 апреля, 2025 - 09:56
Россейни башха-башха регионларындан быйыл Класс башчыланы битеуроссей форумларына къатышырыкъ 87 жангы келечини (Посолну) атлары белгили болгъандыла. Бизни республикадан бу къауумгъа Нальчикни 29-чу номерли гимназиясыны орус тилден бла адабиятдан устазы Гуталаны Светлана сайланнганды. Форум педагогланы биригирлерине, аланы оюмларын жашауда бардырыугъа, тюрлю-тюрлю жумушланы къураргъа къошумчулукъ этерикди.
Ол РФ-ни президенти Владимир Путинни оноуу бла бардырылады эмда мектепледе класс башчыланы бла усталыкъ билим берген махкемелени къауумларында кураторларыны юйретиу иш эмда бир бирлерини сынамларына тюшюнюу жаны бла майданнга бурулгъанды. Форумну Амбассадорла эмда Посолла программасы къуралгъанлы бери билим бериу бёлюмде аслам къыйматлы тюрлениу болгъанды. Ол шарт а бу сообществону устазланы айныуларында магъанасыны даражасын да ачыкълайды.
Класс башчыланы битеуроссей форумлары 2021 жылдан бери бардырылады. Аны келечилерине уа иш кёллю, юйретиу эмда жамауат ишге тири къатышхан, билим бериуню жангычылыкъ программаларын, сёз ючюн, саулукълары бла байламлы энчи окъутууда (юйюрде неда мектепде) болгъанланы, жашауда бардыргъанланы сайлайдыла.
Бизни да быллай жууаплы жумушха таулу къыз тийишли кёрюлгени кёлюбюзню кётюргенди эмда ол мындан арысында да ишинде жетишимли болур деп ышана, анга илхам учунуулукъну тежейбиз.
Светлана Абдуллаховна 2025 жылны кезиуюнде класс башчылыкъ бла байламлы саулайда къыралда бардырылып турлукъ тюбешиулеге оюмлары, кёз къарамлары, тинтиу ишлери бла республиканы устазларыны атындан къатышханлай турургъа да эркинди.
Трамланы Зухура.
