27 мая, 2025 - 11:15
Акъ-Суудан Созайланы Зейтунну жашы Арсен кюз арты чакъырыу бла кетген эди аскерге. Ол Алтай крайгъа инженер-танк аскер бёлюмледен бирине тюшгенди. Аскер усталыкъгъа энди тюшюне башлагъан эсе да, командирле аны низамлыгъына, адеплигине ыразылыкъларын айтадыла.
Арсен, Къабарты-Малкъар къырал университетни медицина колледжин тауусхандан сора, Нальчикде шахар клиника больницада реанимация бёлюмде ишлегенди. Аскерде къуллукъ этип къайтхандан сора, бийик билим алып, саусузлагъа багъар мураты барды.
– Манга Арсенни командирлери сёлешип, атасына бла анасына ыразылыкъларын билдиргендиле. Зейтун бла Марина юч сабий ёсдюредиле. Бу юйюрню кёпле махтайдыла. Арсен а аскерде къуллукъ этерге сюйгенди, артда анга сайлагъан усталыгъында жарарыгъын айтып, - дейди бизге «Аскерчилени аналарыны комитети – аскерчилени ата-аналарыны совети» жамауат биригиуню регион бёлюмюню башчысы Лууланы Жанна.
Бу биригиу аскер бёлюмле, регионлада военкомла, аскерчилени аналары бла байламлыкъла жюрютгенин белгилерчады. Бюгюнлюкде уа Лууланы Жанна энчи аскер операциягъа къатышхан аскерчилени жууукълары бла да ишлейди, аланы тилеклерин толтурургъа болушады, жандауурлукъ жюклени къураргъа да себеплик этеди.
– Манга аскер бёлюмледен Къабарты-Малкъардан жашла башхаладан энчидиле, низамлыдыла, намыслыдыла, алагъа ышанырчады деп сёлешселе, кёлюм кётюрюледи. Арсен а фахмулу медик боллугъуна ишексизме, - дегенди Лууланы Жанна.
