27 мая, 2025 - 10:27
Ич службаны тамата лейтенанты Къужонланы Магомедни къызы Мариям сабийлигинде юридический билим алыргъа мурат этгенди. Таулу къыз итиниулюгюне жетгенди дерге боллукъду – бюгюнлюкде ол инсанланы эркинликлерин сакълайды. Мариям Россейни Сюд приставларыны федерал службасыны КъМР-де Управлениясыны дознание бёлюмюню башчысыны орунбасарыды, къуллукъ этиуде жетишимлери ючюн кёп кере ведомстволу эм республикалы саугъала бла белгиленнгенди, ол санда «Эм иги толтуруучу сюд пристав» белгиле бла дипломгъа, «Къыйыны ючюн» майдалгъа тийишли болгъанды. 2023 жылда уа «ФССП-ны жер-жерли бёлюмю» конкурсда ведомствону управлениясы «Дознанияны къурау» бёлюмде биринчи жерге чыкъгъанды. Бу жетишимге да бизни ушакъ нёгерибиз кесини юлюшюн къошханды.
- Мариям Магомедовна, пристав усталыкъны къалай сайлагъансыз?
- Мен терсликге тёзалмагъанма, не заманда да тюзлюк жанлы болгъанма. Баям, ол себепден тамата класслада юрист усталыкъгъа юйренирге сюйгенме. Пятигорскда Бизнес эм право жаны бла институтда окъугъанма. Сюд приставлагъа сунмай къошулгъанма дерчады, алай бюгюн сайлауум тюз болгъанды деп ишексиз айталлыкъма. Иш женгил тюйюлдю, аны энчиликлерине тюшюнмеген, сюймеген адам кёп заманнга къалмайды мында.
Мени атам КъМР-ни Сюд департаментини Нальчикде бёлюмюню башчысыны къуллугъунда кёп жылланы ишлейди. Ол да мени сайлауума ыразыды, не жаны бла да тутхучлукъ этеди, юйретеди.
Управлениягъа келгенли алты жыл толгъанды. Биринчи Элбрус районда ишлеп башлагъан эдим, артда Май районда бёлюмде тамата сюд пристав болгъанма, 2024 жылда уа Управленияда дознание бёлюмню башчысыны орунбасарыны къуллугъун ышаннгандыла.
- Кертиди, адамла бла ишлеген, борчланы жыйгъан женгил тюйюлдю. Болсада ишни не ючюн сюесиз?
- Хау, тюз атайсыз, къыйынды. Инсанларыбызны эркинликлерин жалчытханым, тюзлюкню сакълаялгъаным ючюн сюеме аны. Сёзге, 2024 жылда Управленияны дозновательлери 320 уголовный иш ачхандыла. Артыкъ уллу тарихле тюйюлдюле, дерикле да болурла. Алай ала адамланы жашаулары, къадарлары бла байламлыдыла. Биз борчларыбызны толтурмасакъ, таматаланы сансызлыкъларындан, оюмсузлукъларындан сабийле ачыйдыла. Ол себепден акъылбалыкъ болмагъанланы законлу праволарын бла эркинликлерин сакълаугъа энчи магъана бериледи. Сёзге, сабийлерини кереклерине ахча бёлмей, борчлары болгъанлагъа 311 уголовный иш ачылгъанды.
Дагъыда манга къуллукъда ёсюу, усталыкъда айныу да магъаналыды. Дознаватель къырал органла эм службала бла бирге ишлейди. Биз бир бирибизни сынауубузгъа юйренебиз, байламлыкъла къурайбыз.
- Приставха салыннган борчланы жетишимли толтурур ючюн, бу усталыкъны сайлагъанны къаллай ышанлары болургъа тийишлиди?
- Баям, бек алгъа иги психолог болургъа керекди. Биз бардыргъан ишле бири бирине ушамайдыла, хар инсан энчиди. Дознаватель а бузукълукъ этгенине ишекли бла ушакъ бардыргъанда, аны праволарын сакъларгъа, аны бла бирге уа битеу шагъатлагъа, ол санда ууакъ шартлагъа да эс бурургъа, аланы бирикдире билирге керекди.
Ишлери бизге берилгенлени кёбюсю къыйын жашау болумгъа тюшгенледиле, ол себепден аланы ангыларгъа, болушургъа кюрешебиз законланы чеклеринде.
Дагъыда иш кёллюлюк, тёзюмлюлюк да болургъа керекдиле. Биз толтургъан бегимле азаймайдыла, алай инсаннга башхаланы жарсыулары керекмейдиле. Анга кесини иши къалай тамамланнганы магъаналыды.
Иш къарыуунгу алады, тюнгюлмезге уа жууукъланы, тенглени кёл этгенлери болушады. Манга уа алгъын таматаларым бек болушадыла. УФССП-ны Элбрус районда бёлюмюню башчысы Атабийланы Иосифни жашы Тахирге, Май районда бёлюмню башчысы Заур Валерьевич Тимишевге ыразылыгъымы айтыргъа сюеме. Дагъыда мен бюгюн къуллукъ этген бёлюмню башчысы Мурат Медалиев бла Управленияны башчысы Бауаланы Ахмат Каллетович мени усталыкъны кёп жашырынлыкъларына юйретгендиле, ала берген билим манга шёндюгю ишимде бек болушады.
Быйыл а Россейни сюд приставларыны институту къуралгъанлы 160 жыл толады. Газетни юсю бла ведомствода къуллукъ этгенлени, ветеранланы да алгъышларгъа сюеме. Алагъа эмда юйюрлерине саулукъ, инсанларыбызны эркинликлерин сакълау жаны бла къыйын ишде жетишимле тежейме.
Тикаланы Фатима.
