9 июня, 2025 - 09:59
Кеслерини билимлерин, саулай да амалларын жамауатдан аямай ишлеген, ыспасха да тийишли болгъан тиширыуларыбыз аз тюйюлдюле. Аллайларыбыз эллерибизде да асламдыла. Аладан бириди Наршауланы Жанчыкъ да.
Ол Тёбен Чегемни эл амбулаториясында процедураланы этген медсестра болуп ишлеп келгенли уа бюгюнлюкде элли жылгъа жууукълашханды. Сайлаууна кертичилей къала, саусузлагъа не жаны бла да онг тапдырыргъа талпыныулукъда, алагъа къайгъырыулукъда ишлегени ючюн а былтыр КъМР-ни Саулукъ сакълау министерствосуну сыйлы грамотасы бла да белгиленнгенди. Алай эсе да, ол кесине эм уллу, магъаналы да саугъагъа эллилерини ыспас, алгъыш сёзлерин санайды.
Жанчыкъ кеси да бу элде атасы Аныуарны уллу юйюрюнде ёсгенди, ала уа тогъуз сабий болгъандыла. Аны себепли уа ол уллугъа, гитчелеге да хурметге ата-анасындан юйрене, кесине усталыкъгъа медицинаны сайлагъанды.
Юйюрде эгеч-къарындаш кёп болуп, билим алыргъа, бийик окъуулула болургъа барысыны да къолларындан келмегенликге, эл аллында хурметлери, жандауурлулукълары бла энчи болгъандыла. Жанчыкъ да, ауурлугъун ата-анасына бермей, къол хунерини себеплиги бла кесине усталыкъ алып, аланы да къууандыргъанды.
Биреуге да къартлыкъ-къарыусузлукъ, аны бла бирге уа ауруу соруп келмейдиле. Анасы Лейлягъа бла ата эгечи Рахиматха да, аланы биреуге ышанмай, кеси ариу къарагъанды, не кереклилерин да жалчытып, аладан да ыразылыкъ тапханды. Баям, жашауда уа ананы ыразылыгъын тапхан ол эм уллу насыпды.
Къоншуда-тийреде да аурукъсуннган адам болса, ала да эм алгъа Жанчыкъны излейдиле. Капельницаларын, уколларын да анга ышанадыла.
- Анабызны алыкъа биреуге окъуна «угъай» дегенин эшитмегенбиз. Аны махтап айтханлыгъыбыз тюйюлдю, кертиси алайды. Юйге келсек, аны солуу кюнде окъуна бир сагъатха къатыбызда тапсакъ, ол бизге сейирди. Нек дегенде жууукъ элледен окъуна аны таныгъанла-билгенле чакъыргъанлай турадыла саусузларына къаратыргъа. Бютюнда бег а къарт адамгъа болушлукъ этерге барып келсе: «Нечик иги эди юйде болгъаным. Къыйналыпды, анга сагъайгъанлай турургъа керекме», - дегенлей турады. Бек тынгысызды саусузлагъа, дегенди къызы Азинат, бизге анасыны юсюнден айта.
Айхай да, къайсы таулу тиширыуча, Жанчыкъ кесини ишини, жамауатны анга ыразылыгъыны юсюнден айтыргъа ийменсе да, бизге да аны таныгъанла-билгенле адамлыкъ ышанларыны, жандауурлукъ сезимини, къатындагъына эс тапдырыргъа не заманда да хазырлыгъыны юсюнден билдиргендиле.
Бир жол медсестра тиширыу вокзалда улоуну сакълап болгъанды. Къалай эсе да, жеринден тепмей, не ары-бери бурулмай, бир жерде асыры кёп олтуруп тургъан эр кишини эслеп, аны халине ишекли болгъанды. Аны алай тургъанын иги жаратмагъанын бирсилеге айтханында, ала: «Къой-къой, бир юйсюз-кюнсюз болур», - деп, артыкъ эс бурмагъанларында да, ол кесини ишеклигине ийнаннганды. «Юсюню-башыны тизгинине кёре, ол сиз айтханча адам тюйюлдю. Туура алай окъуна болса да, адам баласы ушайды да», - деп, аны къатына барады. Инбашына азчыкъ тийип сёлешгенинде, ол, сёлешалмай, хырылдап башлайды. Жанчыкъ, мычымай, терк болушлукъ берген машинаны чакъырып, врачла жетгинчи, саусузгъа биринчи болушлукъну берип, бир кесек эс тапдырады. Келгенле уа анга усталыкъ хунери бийик даражада болгъанын айтып, адамлыгъы ючюн да алгъыш этгендиле. Аллай кезиулеге медсестра уа аз кере тюшмегенди. Аны ангылагъан да къыйын тюйюлдю.
Дуния пандемия болумгъа тюшгенинде да медсестрала, врачла къалай ишлегенлерин барыбыз да билебиз. Тёбен Чегемни медицина ишчилери да бирсиледен кем къалмай къайгъыргъандыла кеслерини эллилерине. «Тюз уруш кезиудеча, аллай хазырлыкъда ишлегенбиз», - дейди.
Коронавирусдан кеси да ауругъанды. Аны себепли жаланда кёзю бла кёрюп, къулагъы бла эшитип угъай, вирусну адамны саулугъуна къаллай заран салгъанын толусунлай сынап, аны болушлугъу кереклилеге не мадар да этип, ол аланы алларында адамлыкъ, профессионал борчун да тынгылы тамамламай къоймагъанды.
Кертиди, анга элли жыл чакълы заманны ичинде усталыгъы бла байламлы аслам затны сынаргъа тюшгенди. Алай эсе да, вирус бла кюреш баргъан кезиуню унутурча болмагъанын чертеди.
Белгилегенибизча, Жанчыкъ бюгюнлюкде да иш юсюндеди. Бирде: «Андан башха жукъ эте билмейме», - деучю эсе да, бахчасына къарагъаны кимге да юлгюлюдю. Тахта кёгетле, жемишле ёсдюргени бла бирге ол гюллени сюеди. Аланы уа, тышында арбазда салгъаны бла чекленип къалмай, къышда юйде терезеде ёсдюреди. Кёпле уа, ийнанмай, аны гюлханийлерине тийип-тийип окъуна кёредиле, сууукъ кезиуде алай ёсгенлерине сейирсинедиле.
Баш иеси Зейтун бла бирге ала юч сабий да ёсдюргендиле. Жанчыкъ бу дунияда эм ачы жарсыуну – баласындан айырылыуну сынагъан эсе да, аны жюреги жашаугъа огъурсузланмагъанды. Бюгюнлюкде жашына-къызына, бютюнда бег а туудукъчукъларына къууана жашайды. Ала да, ынналарын ийнакълай, бош заманларында аны кёрюрге, анга барыргъа ашыгъадыла.
Мокъаланы Зухура.
