3 июня, 2025 - 09:42
КъМР-ни адабият музейинде ремонтну башлардан алгъа хуналарын, чардагъын да тинтип чыкъгъандыла. Мурдоруна бютюн бек эс бурулгъанды. Озгъан ёмюрде ишленнген мекямны мурдор ташы тынгылы болгъаны ачыкъланнганды. Юйню биринчи къатында полну тюбю бош эди, аны толтуруп, тынгылы бетон къуюп, тюзетип, ламинат алай салыннганды.
Музейни директору Азаматланы Артур айтханнга кёре, ремонт ишлени былтыр башлагъандыла. Бюгюнлюкге жазыучу Александр Фадеев солуп кетген мекямда эшиклени, терезелени алышындыргъандыла. Анга кёре ток, жылыу ызлагъа, поллагъа да къаралгъанды. Мындагъы къыйматланы болжал халда республиканы Миллет музейине кёчюрген эдиле.
Салынырыкъ шкафлагъа, витриналагъа былтыр заказ берилгенди. Аланы Саратовда жарашдырып келтирип, энди музейде орнатхандыла.
Бюгюнлюкде Мечиланы Кязимни бла Бекмурза Пачевни, Уллу Ата журт урушда жан берген жазыучуланы стендлери хазырдыла. Энди бу тийреде солургъа келген къонакъла да музейге сюйюп барлыкълары баямды.
Мамайланы Алий.
