3 июня, 2025 - 09:48
Бизни мектеплерибизде эрттеден бери да, сабийлеге жаланда дерслени берип къоймай, аланы Ата журтха сюймекликге, ачыкъ ниетге, туугъан жерин багъаларгъа юйретиуге, ол затланы магъаналарын ангылатыугъа аслам эс бурулгъанлай келеди. Бу жаны бла Черек районну Огъары Малкъар элини Абайланы Мисост атлы 2-чи номерли школу да юлгюлю болгъанлай турады. Алгъадан чертсек, мектепни «Тау къушла» деген къаууму кёп болмай Шалушкада озгъан «Чекчилени жаш шуёхлары» онбешинчи регион даражалы эришиуде быйыл да биринчи жерге тийишли болгъанды.
Мектеп элни тийресиндеги «Огъары Малкъар» атлы чекчи застава бла эрттеден бери байламлыкъ жюрютеди. Аны бла бирге уа сагъынылгъан конкурсха да мында ишлеген устазла бла окъуучула дайым да къатышханлай турадыла.
Биз огъарыда мектеп юлгюлюдю бу жаны бла деп да бошдан белгилемегенбиз. Нек дегенде, сёз ючюн, аны къаууму былтыр да бу эришиуде биринчи жерге чыкъгъанды. Буруннгу жылда аланы келечилери – экинчиле, аны аллында да биринчиле болгъандыла. Айхай да, сабийлени бла аланы хазырлагъанланы быллай жетишимлерин чертирчады.
Быйыл саулай да республикадан эришиуге он къауум къатышханды. Алгъын анга жаланда аланы тийрелеринде чекчи заставала болгъан эллени келечилери баргъан эселе, алгъаракъладан бери уа шахарланы мектеплери да къошулуп башлагъандыла.
Алайды да, конкурсха сегизинчи классха жюрюгенледен башлап къатышадыла сабийле. Огъары малкъарлыла быйыл ары мектепни бошарыкъладан къуралгъан къауумну элтгендиле. Ала уа Жангуразланы Динара, Мамайланы Элдар бла Ислам, Муртазланы Аида, Таукенланы Амин, Токъуйланы Милана, Элсюерланы Лейла эмда Буштокъланы Илиясдыла. Аланы хазырлагъанла уа мектепни директоруну юйретиу жаны бла орунбасары Къазакъланы Мариям, ОБЗР-ден Жангуразланы Шамшудин, физкультурадан окъутхан Занибекланы Алим болгъандыла.
Абайланы Мисост атлы мектепни келечилери, белгилегенибизча, былтыр да биринчи жерге тийишли болгъанлары уа алагъа эришиуню низамларына кёре аны бу жолгъу ачылыуунда къыралны байрагъын кётюрюрге эркинликни бергенди. Алай бла ол жумушну «Тау къушла» къауумну таматасы Буштокъланы Илияс толтургъанды.
Эришиуде сабийлеге сынаула талай жаны бла бериледиле. Ала аскер сауутну чачыу-жыйышдырыу, чабышыу, жашырын жерни къурай эмда аны къалайда орналгъанын ачыкълай билиу, марап атдырыу дегенча затладан хунерлерин кёргюзтедиле. Алай бла, малкъарлыла саулай да эришиуню бирикген эсеплеринден сора биринчи жерге тийишли болгъанлагъа саналып къалмай, энчи алып айтханда, чабышыудан бла жашырын жерни къураудан да он къауумну арасында хорламгъа чыкъгъандыла.
Хар сабийни жетишимин чертгенде уа, Мамайланы Элдар марап атдырыудан эм кючлюге саналгъанды. Ол бу жаны бла 86 баллны къытханды. Саулай къауум, энчи жетишимле болдургъан жашла да сыйлы грамотала бла да саугъаланнгандыла.
Бизни бла къысха ушакъны кезиуюнде Мариям Абуевна кезиулю хорламны болдургъанлары ючюн сабийлени кёллери кётюрюлгенлерини, аны бла бирге уа бу жумушда устазла, кеслерини ишлерин къалай бардыргъанлары ачыкъланнганыны юсюнден да айтханды. Жаш тёлюге быллай эришиулени магъаналарын, ала патриот ниетледе ёсерге себеплик этгенлерин, чыныгъыулукъгъа да юйретгенлерин белгилегенди.
Мокъаланы Зухура.
