22 июля, 2025 - 09:07
Окъуучула мектеплени бошап, Бир къырал сынауланы берген кезиуде хар заманда да аладан бийик эсеплени сакълай, жетишимли болурларын излейбиз. Бу жол а, биринчиле болуп, бизни Черек районну школларын тауусхан къызчыкъла кёллендиргендиле.
Текаланы Далианна да Къашхатауданды. Ол да медицинаны жолун сайлагъан къызларыбызданды, кесибизни университетибизде билим алыргъа дейди.
Бир къырал сынаулада жетишимлерин айтсакъ, орус тилден 94 баллгъа тийишли болгъанды (устазы Мокъаланы Зухура Докаевна). Химиядан а эсеби 86 баллды, бу дерсден Токумаланы Анна Юсюповна окъутханды. Математиканы мурдорлу тюрлюсюнден а ишин «бешге» жазгъанды. Алай бла уа ол да алтын майдалгъа кертиси бла тийишли болгъанын кёргюзтгенди. Нек дегенде, барыбыз да билгенликден, тохташдырылгъан низамгъа тийишлиликде, аллай саугъа берилир ючюн, окъуучу ЕГЭ-лени 70-ден аз баллгъа жазмазгъа керекди.
- Сынаулагъа эки жыл чакълыны хар кюнден солумай, алай хазырланнганма. Болсада орус тилден аллай бийик эсепни сакъламагъанма, химиядан а андан кёбюрек боллукъ суннган эдим. Мектепде дерслеримден тышында, Интернетни амалларын хайырланнганма. Сёз ючюн, биологиядан Москвадан устаз бла хазырланнганма, химиядан а Уралдан педагог юйретгенди. Барысына да ыразыма, нек дегенде узакъгъа репетиторлагъа жюрюп туралмагъан адамгъа бу ахшы амалды. Андан сора да, аланы да бош алай сайлап къоймайса, бизге дери мектеплени бошагъанла къаллай оюмла жазгъанларын окъуп, анга кёре айыраса, - дегенди кеси уа бизни бла къысха ушагъыбызда.
Белгилегенибизча, ол врач болур муратлыды. Бу усталыкъны да бошдан сайламагъанды, анга юлгю анасыны келини, республикабызда белгили врач Тогъузаланы Залина Хадисовнады. Окъургъа уа КъМКъУ-да сюеди эмда бюгюнлюкде студент болургъа хазырланады.
Аны биологиядан, орус литературадан да Окъуучуланы битеуроссей дерс олимпиадаларында районда, республикада да айырмалы болгъанын белгилерчады. Аны бла бирге уа малкъар тилде шатык сёлешгенин да.
Аны биологиядан 98 баллгъа тийишли болгъанын а материалны хазырлай туруп билгенбиз эмда къууаннган да этгенбиз. Мектепде бу дерсден Далианнаны Холамханланы Жаннета Нажмудиновна окъутханды.
Огъары Малкъардан Гузойланы Камилла уа орус тилден 91 баллгъа тийишли болгъанды. Ол элни Уммайланы Мухажир атлы 1-чи номерли мектебин бошагъанды. Къызчыкъ КъМКъУ-ну филология факультетини орус-малкъар бёлюмюне кирирге акъыл этеди. Орус литературадан эсеби да 60 балл чакълыды, математикадан «беш» алгъанды. Энди уа университетни кесинде малкъар тилден сынауну берирге хазырлана турады.
Камилланы сайлаууна юйде да ыразыдыла, ол билим алып, туугъан элине къайтыргъа, мында устаз болургъа сюеди. Усталыкъны сайларгъа анга юлгю болгъанла, илхамын ачханла уа аны окъутханла Темуккуланы Фатима бла Атабийланы Захидадыла.
Ол малкъар тилден дерс эришиулеге къатыша, айырмалы бола да тургъанды. Ёз тилибизде басмаланнган адабият чыгъармаланы окъургъа бютюнда сюеди. Гузойланы юйюрлери газетибизни да дайым жаздыргъанлай келеди.
Орус тилден а Камилла репетиторгъа Хасаниягъа жюрюгенди, анга ыразылыгъын да билдиреди. Орус литературадан а онлайн-мектепни хайыры бла хазырланнганды. Анда темалагъа кёре къайсы дерсге не заманда да къараргъа боллугъун эмда ызы бла берилген ишледе жиберген халатларынг терк окъуна ачыкъланып баргъанларын жаратады.
Дерслеринден тышында уа ол спортну да сюеди. Волейболдан мектепде секциягъа жюрюп тургъанды. Бу жаны бла тренери Занибекланы Алимге ыспас этеди. Элде ёсген къызчыкъ юйде ата-анасына не жаны бла болушлукъ этерге да сакъды, ала аны сайлауунда бютюнда кёллендиргенлери, таукеллендиргенлери ючюн юйюрюне ыразыды.
Жыл сайын да биз ЕГЭ-леде бийик эсепле алгъанлагъа къууаннган, ёхтемленнген да этебиз. Аны бла бирге уа ол шарт – сабийлени аллай жетишимле болдургъанлары – аланы окъутханланы, юйретгенлени да усталыкъ даражаларын, иш кёллюлюклерин ачыкълайды, билим алгъан мектеплерини даражаларын да бютюнда бийик этеди.
Мокъаланы Зухура.
