19 августа, 2025 - 11:06
Не заманда да жаш адамла кеслерини муратларына жетер эмда иш юсюнде жетишимли болур ючюн башха-башха окъуу юйлеге кирип, алада билим аладыла. Алыкъа дипломларын къолларына алмагъан жашланы бла къызланы усталыкъларында айныуну юсюнден къаллай сагъышлары болгъанларын билир мурат бла алагъа соруу бергенбиз. Бюгюн а аланы бир къауумуну жууаплары бла окъуучуларыбызны шагъырей этерге сюебиз.
ТАУМУРЗАЛАНЫ Фарида, «Биология» ызны студенти:
- КъМКъУ-гъа окъуугъа кире туруп, алыкъа илму бламы кюреширге огъесе студентлеге билим берирге сюйгеними кесим да иги билмегенме. Алай эсе да, хар заманда жетишимли болургъа уа итиннгенме. Лабораторияда да ишлерге бар эди муратым, студент жашауум сейир болса сюйгенме, белгили адамла бла тюбешиулени да жаратханма, не аз да онг болуп, жыйылыулагъа къатышмай да къалмагъанма.
Энди, манга 21 жыл толгъанда уа, кесими андан иги да жашыракъ заманымы эсге тюшюре, ангылайма тюз жол бла баргъанымы. Кертиси бла да, кесими кёргюзте да билгенме: энди, мурат этгенимча, лабораторияда да ишлейме, аслам сейир, хунерли адамны да таныгъанма, алай эсе да, алыкъа умутум толургъа кёп зат кереклисин ангылайма. Жюрегим бла къууанама университет манга муратларым толгъан жер, анга мурдорлукъ этген окъуу юй болгъанына да.
КЪУЛИЙЛАНЫ Марина, СГИ-ни «Лингвистика» ызыны студенти:
- Кюрешген ишимде жетишимли болгъандан сора да, ол манга сюйген адамларым бла жолоучулукълагъа барырча, солурча онгла да берсе сюеме. Сабийлерим дунияны уллулугъун эмда сейирлилигин кёрселе, анам да бизни бла бирге жангы жерлеге сюйюнюп, къууанса да.
Ишде жетишимли болуу – ол юйюр жылыуну селейтмей, анга хата салмай, аны бютюн кючлей барырына, адамла бир бирлери бла асламыракъ заманны турурларына себеплик этерине ийнанырыгъым келеди. Алай бла уа насыплы, жетишимли да биргелей боллукъларына. Нек дегенде ишинг ючюн эм уллу саугъа – ала юйде адамларынгы ышарыуларыдыла, аланы тынчлыкълы жашауларыды эмда эсде кёпге дери сакъланырыкъ бирге оздургъан зауукълу кезиулерибиздиле.
АКЪКЪУЛЛАНЫ Даут, «Информатика эмда тергеулени бардыргъан техника» ызны магистри:
- Хунерли устача, усталыгъымда тохтамай айный, программала хазырлау жаны бла жетишимли болургъа итинеме. Жаланда алгъан билимими хайырланыу бла чекленип къалмай, жангы технологиялагъа тири юйреннгенлей турургъа да. Муратым чынтты профессионал болургъады – хайырлы эмда тынгылы IT-жууапланы жарашдыра билген. Келир заманда кесими къыйматлы проектлени къурагъан къауумну арасында кёреме.
Андан сора да, тынчлыкълы, шош эмда саулукълу жашауну юсюнден сагъыш этеме. Усталыгъым жаланда ырысхы келтирген жер болуп къалмай, зауукълукъ да берирча. Бир жанындан, хар затха да жетишип, сейирим бла ишлерге сюе эсем, экинчиден а, жууукъларым бла солургъа, жолоучулукълагъа барыргъа сюеме. Санынг, жанынг да саулукълу болсала уа, айхай да, ол магъаналыды. Саулай алып айтханда, ишге, зауукълукъгъа да орун табыллыкъ толу эмда сейир жашауум болуруна итинеме.
