26 августа, 2025 - 09:07
Не заманда да жаш адамла кеслерини муратларына жетер эмда иш юсюнде жетишимли болур ючюн башха-башха окъуу юйлеге кирип, алада билим аладыла. Алыкъа дипломларын къолларына алмагъан жашланы бла къызланы усталыкъларында айныуну юсюнден къаллай сагъышлары болгъанларын билир мурат бла алагъа соруу бергенбиз. Бюгюн а аланы бир къауумуну жууаплары бла окъуучуларыбызны шагъырей этерге сюебиз.
АХМЕТЛАНЫ Хадижа, «Математика» ызны студенти:
- Жашауда манга эм магъаналы зат – ол ышаннгылы адам болууду. Эм алгъа акъылыма ол келеди. Халаллыкъны кёп тюрлю ангыларгъа болады, алай эсе да, хар неге да мурдорлукъну уа ол этеди.
Усталыкъны юсюнден муратланы айтсагъ а, жаланда бир энчи ызда тохташып, аны сайлау не заманда да тынч кёрюнмегенди. Энди бюгюнлюкде, студент болгъанымдан сора да, аллай сайлау манга къыйынлай къалады. Алай эсе да, окъугъан жериме, билим алыргъа берилген онглагъа, айныр амаллагъа ыразыма. Хар заманда да санга зауукълукъ берген ишни излерге, анга талпыныргъа болады.
Окъууну бошар заманыма уа кесими къалай кёргеними алыкъа айталмайма, нек дегенде аллай узакъ кюнлени юслеринден сагъыш этмегенме. Мындан ары уа билимиме ышана эмда хар не ахшы жанына бурулуруна ийнана, окъуууму андан ары бардырлыкъма.
Бегенч ЧАРЫЕВ, Туркменистан, ВШМО-ну хазырлау бёлюмю:
- Сабийлигимден бери да ингилиз тилни бийик квалификациялы устазы болургъады талпыныуум. Нек дегенде мен аны жаланда усталыкъныча угъай, жюрегими излеминча сеземе. Университетде кесими хунерими айнытыргъа кюрешеме, бегирекда орус тилни терен билиуге эс бурама, нек дегенде бу жаны бла ангылауум да бийик даражада болса сюеме.
Андан сора да, студентлени алышыу маданият проектлеге да къатышырма деген умутдама. Алай болса, башха-башха халкъланы культураларындан толу хапарлы боллукъма. Быйыл да аллай бир жумушха къатышып, сынам да алгъанма эмда аллай башламчылыкъла жаш тёлюню айныууна ахшы амал болгъанларын да айталлыкъма.
Устаз болсам, усталыгъымы юсю бла зауукълукъ табарыкъма, насыплы боллукъма, андан сора да, ишимде жетишимлерим да окъуучуларымы эсеплери бла ачыкъланырыкъдыла, деген умутдама. Аны бла бирге уа билим бериуде эсленирча ыз къояр эмда жаш тёлюге не къадар тилни билселе да, ол шарт аланы жашауларына ахшы онг боллугъун, аны себеби бла кеслерине кёп жолну ачаллыкъларын да ангылатыргъа сюеме.
Марианна БОЛОВА, СГИ-ни «Лингвистика» ызыны магистри:
- «Умут» деген сёзню хар заманда да бир бийик эмда бир кесек ажайып затныча окъуна сезгенме. Алыкъа да ол кесим излеген, талпыннган затха жетдирлик ишни, жолну излеудеме. Алай эсе да, бир затны уа толусунлай билеме – мен кюрешген чыгъармачылыкъ биреуге да жарар, себеплик берир, деген муратда ишлерикме.
Адамланы саулукъларына болушлукъ этерча усталыкъгъа окъур онгум болмагъан эсе да, врач тюйюл эсем да, бизни къайсы бирибиз да кесини ишлеген жеринде башхалагъа да себеплик болурча эталлыгъына уа ийнанама. Аны ючюн а халал къыйыныбыз бла ишлерге эмда жашаргъа керекбиз. Ол кесинг сюйген жумуш бла да ачыкъ ниетинг бла кюреширге.
Жаратхан ишим а жазыучулукъду. Аны бла байламлы бир къыйматлы зат къураргъа сюеме. Ол аллай китап болургъа керекди, аны окъугъандан сора адамла кеслерин игирек болгъанча сезерча, аны тизгинлеринде аланы жюреклерине жууукъ болгъан затны табып, аны уа игилик ючюн хайырланырча. Неда кеслерини жарсыуларындан, сагъышларындан бир кесекге окъуна айырылып, къууанч сезимлери болурча. Баям, олму болур «умут» деген ангылам.
ТРАМЛАНЫ Зухура хазырлагъанды.
